Almaty qalasy İshki saıasat basqarmasynyń qoldaýymen «Social project management» ortalyǵy Prezıdent Qasym-Jomart Toqaevtyń 2025 jyly halyqqa arnaǵan Joldaýynda atap kórsetilgen «Zań jáne tártip» qaǵıdatyn ornyqtyrý maqsatynda «Bas bostandyǵynan aıyrý oryndarynan shyqqan adamdardy áleýmettik beıimdeýdegi ózekti máseleler» atty dóńgelek ústel ótkizdi, - dep habarlaıdy Aqshamnews.kz.
Dóńgelek ústelge Almaty qalasy Qylmystyq-atqarý júıesi departamentiniń, Eńbek mobıldiligi ortalyǵynyń ókilderi, jumys berýshiler, zańgerler, quqyqtanýshylar, psıhologtar, jastar qatysty.
Dóńgelek ústel uıymdastyrýshy ári joba jetekshisi Beıbit Moldahmetulynyń kirispe sózinen bastaldy. Ol úsh jylǵa sozylǵan joba aıasynda atqarylǵan jumystarǵa toqtalyp, jobaǵa belsendi atsalysqan barlyq qatysýshylarǵa alǵys aıtty. «Joba aıasynda bıyl 40-tan astam adamǵa quqyqtyq kómek kórsetildi. Túrmelerde psıhologıalyq trenıńter ótip, 120-dan astam adam qamtyldy. Jumys berýshilerdi shaqyryp, abaqtydan shyqqandarmen kezdestirdik» dedi ol.
Kelesi sóz kezegi qaladaǵy túzeý mekemelerinde psıhologıalyq trenıńter ótkizgen Gúlbaným Mýradýllaevaǵa tıdi. Onyń aıtýynsha sottalǵandar túrmeden shyqqan soń qaıtadan qylmysqa urynyp, túrmege taǵy túsemiz be dep alańdaıdy eken. «Ár adamda ishki tirek bolady. Ol jastyq shaqta qalyptasady. Jazasyn ótep jatqandarda osy ishki tirek qalyptaspaǵan. Men olarǵa sondaı ishki tirek taýyp berýge tyrystym» deıdi G.Mýradýllaeva.
Almaty qalasy QAJ departamenti jobanyń uıymdastyrýshylardyń basty seriktesi boldy. Osy departamenttiń probasıa qyzmetiniń basshysy, ádilet maıory Mırlan Aqsaqalov jobanyń ómirsheńdigine nazar aýdaryp, joba kelesi jyly da jalǵassa eken dep nıet bildirdi. Sonymen qatar ol Memleket basshysy Qasym-Jomart Toqaevtyń «Zań jáne tártip» qaǵıdatyna toqtaldy. «Qoǵam jaqsy ómir súrý úshin birinshi kezekte zań ústemdik etý kerek. Sosyn zańnyń ústemdigin, ıaǵnı tártipti qamtamasyz etetin quzyrly mekemeler tıimdi jumys isteýi tıis» dep atap ótti ádilet maıory.
Al quqyqtanýshy Qalbýbı Janbotaevanyń sózinshe sottalǵandarǵa quqyqtyq kómek kórsetý uzaq prosesti qamtıdy eken. «Aryz, ótinishtermen qatar jábirlenýshi, aıyptaýshy taraptardyń hattaryn jınap, sotqa jiberemiz. Sot olardyń keıbirin qanaǵattandyrady, keıbirin qanaǵanttandyrmaıdy. Kerek deseńiń ne úshin qanaǵattandyrmaǵanyna túsinikteme de bermeıdi. Sol sebepti qujattardy jınap alty aıdan keıin sotqa qaıtadan aryz-ótinish ótkizýge májbúrmiz» degen quqyqtanýshy, probasıa qyzmetkerleriniń jumystaryna da mán berip, olardyń eńbekaqylary az ekenin tilge tıek etti. Túrmeden shyqqandardyń isimen aınalysatyn mamandardyń aılyǵy joǵary bolý kerektigin aıty.
«Kazmontaj» JSHS bas ınjeneri Ulan Mekebaev jobaǵa belsendi qatysqan jumys berýshilerdiń biri. Ol bas bostandyǵynan aıyrý oryndarynan shyqqan adamdarmen tikeleı áńgimelesý júrgizgen maman. «Bizge elektr symyn tartýshy, montaj jasaýshy mamandar kerek. Aılyq 300 myń teńgeden bastalady. Túrmeden shyqqan birneshe azamatty jumysqa shaqyrdym. Biraq olar jumysty kópsinip, aılyqty azsyndy» dedi jumys usynýshy kompanıanyń ókili.
Dóńgelek ústel sońynda sóz alǵan quqyqtanýshy Baqyt Aqyshev jobanyń mańyzyna toqtaldy. «Bul ońaı joba emes. Túrmeden shyqqandar bylaı tursyn ýnıversıtet bitirgenderge jumys taýyp berý qıyn qazir. Ár jumys berýshiniń aldyna baryp, kezdesýge shaqyrý da energıany talyp etedi. Men ózim biraz jyl quqyq qorǵaý salasynda istegen adammyn. Bizdiń kezimizde isti bolǵandarmen jumys júrgizý ýchaskelik polısıalarǵa tapsyrylatyn. Qazir olar úshin probasıa qyzmeti ashylyp, polıseılerge túsetin júktemeler jeńildedi» dep qorytyndylady ol.