Qazaqstannyń Eńbek kodeksinde qashyqtan jumys isteý múmkindigi kózdelgen.
Eńbek jáne halyqty áleýmettik qorǵaý mınıstrligi mundaı jumys kestesi kimderge belgilenetinin jáne qalaı rásimdeletinin túsindirdi, - dep habarlaıdy Aqshamnews.kz
Qyzmetker de, jumys berýshi de qashyqtan jumys isteýge kóshý týraly bastama kótere alady. Eńbek kodeksinde qashyqtan jumys isteı alatyn adamdar toby naqty kórsetilmegendikten, mundaı rejım kez kelgen qyzmetkerge qoldanylýy múmkin. Biraq kóbine bala kútetin adamdarǵa, ýaqytsha eńbekke jaramsyz adamdarǵa, shalǵaı eldi mekenderde turatyndarǵa jáne taǵy basqa jaǵdaılarda belgilenedi.
«Qashyqtan jumys isteıtin qyzmetkerler úshin eńbek shartynda nemese jumys berýshiniń aktisinde belgilengen jumys ýaqytynyń kúndelikti uzaqtyǵyna, baqylaý erekshelikterine shekteýler saqtala otyryp, jumys ýaqytynyń turaqty esebi belgilenedi. Qashyqta jumys istegeni úshin eńbekaqy qyzmetkerdiń biliktiligine, oryndalatyn jumystyń kúrdeliligi men sapasyna qaraı eńbek sharttarynda jáne jumys berýshiniń aktisinde kózdelgen jumys kólemi aıaqtalǵannan keıin tolyq kólemde tólenedi», - dep túsindirdi mınıstrliktiń memlekettik eńbek ınspeksıasy komıtetiniń bas sarapshysy Bıbarys Táńirbergenuly.
Eger tótenshe ne áskerı jaǵdaı, karantın nemese qyzmetkerdiń densaýlyǵyna qaýip tóndiretin basqa da erekshe jaǵdaılar bolsa, jumys berýshi ýaqytsha qashyqtan nemese aralas jumys rejımin engize alady. Bul rette qyzmetkerdi jumys isteý úshin qajetti jabdyqtarmen, aqparattyq tehnologıa quraldarymen, baılanys qyzmetterimen jáne basqa da quraldarmen qamtamasyz etý, sondaı-aq shyǵyndardy óteý jumys berýshiniń aktisimen aıqyndalady.