Astana men Atyraý da osy qatarda.
Ulttyq Banktiń málimdeýinshe, qańtarda 2300-den astam altyn quımasy satyldy, dep habarlaıdy Almaty-akshamy.kz
2023 jyldyń qańtar aıynda ekinshi deńgeıli bankter men banktik emes jekelegen aıyrbastaý pýnkterinde jalpy salmaǵy 79,5 keli 2 364 altyn quıma satylǵan.
Halyqqa tazartylǵan altyn quımalardy satý jáne satyp alý baǵdarlamasyn (budan ári – Baǵdarlama) Ulttyq Bank 2017 jyly iske qosqan bolatyn. Baǵdarlama qolǵa alynǵaly jalpy salmaǵy 3,9 tonna 115 209 altyn quıma satyldy.
"Altyn quımalar bes túrli salmaqta usynylady: 5, 10, 20, 50 jáne 100 g. Satyp alýshylar arasynda suranysqa ıe túri – 10 gramdyq altyn quıma. Jalpy satylǵan quımalar arasynda onyń úlesi 26% – 29 723 dana. Odan keıin 5 gramdyq altyn quıma – 25 538 dana (22%), 100 gramdyq quıma – 23 460 dana (20%), 20 gramdyq quıma – 23 131 dana (20%), jáne 50 gramdyq quıma – 13 357 dana (12%). Altyn quımalar Almaty, Astana jáne Atyraý qalalarynda kóp satylady", – dep jazylǵan Ulttyq Bank taratqan habarlamada.
Altyn quıma – senimdi ınvestısıa quraly. Altyn quımalar naryǵyndaǵy ótimdiliktiń basty kepili – bank pen banktik emes aıyrbastaý pýnkteri klıentke aqshany sol kúni tóleı otyryp, quımalardy keri satyp ala alady.
Baǵdarlama bastalǵannan beri ekinshi deńgeıli bankter men banktik emes jekelegen pýnkter jalpy salmaǵy 484,6 keli 19 228 altyn quımany keri satyp aldy, bul – jalpy satylǵan quımalardyń 17%-y. Keri satyp alynǵan quımalardyń barlyǵy Ulttyq Banktiń aýmaqtyq fılıaldary arqyly halyqqa satylady.
"Árbir quıma qorǵaý elementterimen qaptalǵan (quımanyń aına beti, mıkrotekst jáne jıegi bar) jáne arnaıy qorappen shyǵady. Sol arqyly quımanyń ashylǵan-ashylmaǵanyn ońaı tekserýge bolady. Qorǵap turatyn qorap sapa sertıfıkaty bolyp ta sanalady. Sondyqtan, altyn quımany uqyppen saqtap, qorabyn búldirmeýge keńes beremiz", – dep habarlady UB.