Segiz saıabaqta jańartý jumystary júrgizilip jatyr.
Almatynyń shetinde alty saıabaq salynady, dep habarlaıdy Almaty-akshamy.kz.
Jańa salynatyn saıabaqtardyń basym bóligi Alataý aýdanynda ("Zerdeli", "Boraldaı", "Saıaly", "Ójet" shaǵynaýdandary), sondaı-aq Medeý ("Alataý" sh/a) jáne Naýryzbaı aýdandarynda (Qarǵaly jaǵalaýynyń boıynda) bolady. Bul saıabaqtar balalar jáne sport alańdarymen, rekreasıalyq aımaqtarmen jabdyqtalady.
Búginde qalada jalpy alańy 631,2 ga bolatyn 211 saıabaq aýmaǵy ornalasqan. Qazirgi ýaqytta segiz nysandy, onyń ishinde saıabaqtardy, skverlerdi jáne t.b. abattandyrý, jóndeý jáne qaıta jańartý jumystary júrgizilýde.
Nysandardyń biri – QBTÝ ǵımaratynyń artyndaǵy «Severnyı» skveri. Onda bastapqyda tek sýburqaqty rekonstrýksıalaý josparlanǵan bolatyn. Alaıda, tekserý barysynda búkil alańnyń tozǵany anyqtaldy. Nátıjesinde búkil aýmaqty qaıta qurý týraly sheshim qabyldandy. Joba boıynsha aǵashtardy sanıtarlyq kesý, kógaldandyrý, brýschatkany jańartý, syrtqy jaryqtandyrý, sondaı-aq qala turǵyndary men qonaqtarynyń qaýipsizdigi úshin beınekameralar ornatý qarastyrylǵan. Barlyq jumystardy 2022 jyldyń qazan aıynda aıaqtaý josparlanýda.
Baıseıitova kóshesi boıymen Sátpaev kóshesinen Jambyl kóshesine deıingi jaıaý júrginshiler aımaǵy sport, balalar alańdarymen, oryndyqtarmen, qoqys jáshikterimen jabdyqtalady, syrtqy jaryqtandyrýdy ornatý josparlanýda. Qazirgi ýaqytta merdigerlik uıymnyń buzýshylyqtaryna baılanysty jumystar ýaqytsha toqtatyldy. Kompanıa mamandary jumys barysynda 10-ǵa jýyq aǵashtyń tamyr júıesine zaqym keltirgen. Jaqyn arada osy ýchaskedegi problemalyq máselelerdi talqylaý úshin jurtshylyqpen kezdesý ótkizý josparlanýda.
Ótken jyly Bostandyq aýdanynda jalpy aýmaǵy 3,4 ga bolatyn «Dostyq» saıabaǵyn abattandyrý jáne kógaldandyrý jumystary júrgizildi. Qaıta qurý aıasynda asfált jabyndary jańartyldy, oryndyqtar men qoqys jáshikteri ornatyldy, syrtqy jaryqtandyrý jáne sýarý júıesi júrgizildi, workout jáne balalar oıyn alańy salyndy.
Qala ortalyǵynan alys ornalasqan árbir aýdanda serýendeıtin aımaqtar salý josparlanýda. Mysaly, Boraldaıdaǵy saıabaq Terenkýrǵa uqsas bolady, al Zerdelide Ortalyq mádenıet saıabaǵyna uqsas jastar saıabaǵy salynady.
Qazirgi ýaqytta qalanyń saıabaqtary men gúlzarlaryn kútip ustaýda problemalar bar. Osy máseleni sheshý úshin qalanyń saıabaqtary men gúlzarlaryn kútip ustaý jáne olarǵa qyzmet kórsetý jónindegi jumystardyń tıisti sapasyn jáne baqylaýdy qamtamasyz etetin biryńǵaı operator – "Eco Almaty" JSHS berý týraly usynys engizildi.
Eske salsaq, buǵan deıin Almaty ákimi Erbolat Dosaev «Jeltoqsan» saıabaǵyn abattandyrý jumystarynyń barysyn teksergen bolatyn. Tekserý barysynda qala ákimi trotýar plıtkalaryn tóseý sapasyn synǵa alǵan edi, munda barlyq jaıaý júrginshiler jolyna tóselgen tastar basylyp ketken ári jaryqtar, chıpter paıda bolǵan. Qala basshysy aǵash oryndyq keshenderiniń betin óńdeý tehnologıasyna qatysty eskertý jasady – óıtkeni oryndyq keshenderiniń boıaýy búkil nysan paıdalanýǵa bergenge deıin túsip, eskirip ketedi.
Rekonstrýksıalanatyn jáne abattandyrylatyn obektilerdiń tolyq tizimi:
- «Jeltoqsan» saıabaǵy Túrksib aýdanyndaǵy "Maıak" shaǵynaýdany;
- Esentaı ózeniniń jaǵalaýy, Jetisý aýdanyndaǵy "Kókmaısa" shaǵynaýdany;
- Medeý aýdanyndaǵy Oqýshylar saraıynyń janyndaǵy skver;
- Almaly aýdanyndaǵy QBTÝ artyndaǵy «Severnyı» skveri;
- Baıseıitova kóshesi boıyndaǵy jaıaý júrginshiler aımaǵy Sátpaev kóshesinen Jambyl kóshesine deıin;
- «Almaty zoologıalyq parki» KMQK aýmaǵynda tazartý qurylystaryn paıdalana otyryp, toǵandardy abattandyrý;
- Medeý aýdanyndaǵy sý bólgishten Jamaqaev kóshesine deıingi Esentaı ózeniniń sý qorǵaý beldeýi men arnasy;
- Jarbulaq ózeniniń arnasyn rekonstrýksıalaý;
- Baıseıitova kóshesindegi jaıaý júrginshiler aımaǵy;
- «Severnyı» skveri.
