Almatyda tórt sýburqaq kesheniniń qaıta jańartylýy bastaldy, olar Almaty ákimdiginiń Shyǵys jáne Batys sýburqaqtary, Respýblıka alańyndaǵy sýburqaq jáne Ǵ.Músrepov atyndaǵy teatr ǵımaraty aldyndaǵy sýburqaq.
Jobanyń saraptamasy kórsetkendeı, bul nysandardyń tehnıkalyq jaǵdaıy qanaǵattanarlyqsyz. Gıdrooqshaýlaýdyń tozýy, eskirgen nasos qondyrǵylary men súzgileý júıeleri keshendi jańartýdy qajet etedi.
Modernızasıa aıasynda tehnıkalyq ǵımarattardyń qurylymdaryn kúsheıtý, ınjenerlik komýnıkasıany, sý jabdyqtaýdy, gıdrooqshaýlaýshy qabatty tolyq aýystyrý, nasos stansıalarymen jáne sý súzý júıelerin jańartý, avtomattandyrylǵan basqarýdy engizý, sondaı-aq, jaqyn aýmaqtardy kórkeıtý josparlanǵan.
Sonymen qatar, búrikkishter, jaryqtandyrý quraldary, sorǵy qondyrǵylary, baseınder, jaryqtandyrý, qubyrlar, granıt plıtalary jáne basqa da mańyzdy elementter aýystyrylady.
Qala turǵyndarynyń qaýipsizdigin qamtamasyz etý úshin sýburqaq keshenderinde elektr togynyń soǵý qaýpin boldyrmaıtyn tómen vóltty shamdar men qurǵaq sorǵy jabdyqtary ornatylady. Sýdy tazartý belsendi ottegi generatoryn qoldaný arqyly júzege asyrylady, bul suıyq hlordan bas tartýǵa jáne paıdalaný shyǵyndaryn azaıtýǵa múmkindik beredi.
Aıta ketý kerek, sýburqaqtardy aýqymdy qaıta jańartý alǵash ret júrgizilip otyr. Buryn tek kishigirim jóndeý jumystary ǵana jasalǵan. Jobanyń aıasynda tarıhı kelbetti saqtaý erekshe nazarda bolady, bul jańartylǵan nysandardyń sáýlettik qundylyǵyn saqtap, qala landshaftynda úılesimdi túrde ornalasýyn qamtamasyz etedi.
Qurylys-montaj jumystary sáýirde bastalyp, 2025 jyldyń qazan aıynda aıaqtalady. Qaıta jańartýdan keıin sýburqaqtar qala turǵyndary men qonaqtary úshin ásemdik pen demalys aımaqtaryna aınalady.
Tarıhı anyqtama:
Almaty ákimdiginiń Shyǵys jáne Batys sýburqaqtary 1979 jyly Qazaq KSR Kompartıasy Ortalyq Komıtetiniń birinshi hatshysy D. A. Qonaevtyń bastamasymen iri sáýlet jobasy aıasynda salyndy. Olardy ázirleýmen sáýletshi Q. Montahaevtyń basshylyǵymen «Almaataǵıprogor» jobalaý ınstıtýty aınalysty. Sýburqaqtar Respýblıka alańynyń aınalasyndaǵy ákimshilik ǵımarattar ansambline úılesimdi túrde ornalasqan. 2010 jyly sýburqaqtarǵa kosmetıkalyq jóndeý júrgizilgen, biraq qazirgi ýaqytqa deıin kúrdeli jańartý jumystary júrgizilmegen.
Respýblıka alańyndaǵy sýburqaq 1979 jyly salynǵan jáne osy alańnyń basty elementi bolyp tabylady. Onyń jobasyn da arhıtektor K. Montahaev pen «Almaatagıprogor» ınstıtýty ázirlegen. 2010 jyly jóndeý jumystary júrgizildi, biraq qazir qurylymdar men ınjenerlik júıelerdi tolyq jańartý qajet.
Ǵ.Músirepov atyndaǵy teatr ǵımaraty aldyndaǵy sýburqaq 1962 jyly salynǵan. Joba avtorlary sáýletshiler A.A. Leppık, N.I. Rıpınskıı jáne V.Z. Kasev. 2009 jyly sýburqaq ishinara qalpyna keltirildi, biraq búginde ol kúrdeli jóndeýdi qajet etedi.