№4 qalalyq klınıkalyq aýrýhanada halyqaralyq sheberlik synyby ótti, onda travmatologtar men ortopedter tolyq avtomattandyrylǵan ortopedıalyq júıemen ota jasaý daǵdylaryn jetildirdi.
Bul sheberlik synyby barysynda tize býynynyń patologıasy bar tórt naýqasqa robot kómegimen endoprotezdeý otalary jasaldy. Robot júıesi tize býyndaryn stereotaktıkalyq qurylǵy retinde qoldanyp, naýqastardyń MRT jáne KT sýretterin paıdalana otyryp, hırýrgtarǵa ota aldyndaǵy daıyndyqty josparlaýǵa jáne operasıa barysynda analıtıkalyq aqparat berýge kómektesti.
Bólimshe meńgerýshisi Manarbek Áýbákirov robot kómegimen alǵashqy otalardyń birin sátti jasady.
«Biz tize býynynyń 3-4 dárejeli deformasıalyq gonartrozymen 10 jyldan astam ýaqyt boıy aýyryp júrgen naýqasqa operasıa jasadyq. 3 nemese 4 dárejeli gonartrozdy emdeýdiń eń tıimdi joly – hırýrgıalyq aralasý. Ota aldynda tize býynynyń kompúterlik tomografıasy jasalyp, onyń derekteri júıege júkteldi. Robot biz úshin deformasıany, ımplant ólshemin eseptep, ota kezinde júıe tapsyrmany óz betimen oryndady. Robot mıllımetrlik dáldikpen otalyq aımaqty kesip, adam faktoryn tolyǵymen joıdy. Bul joǵary deńgeıdegi mamandandyrylǵan tehnologıa bolǵandyqtan, naýqas tezirek qalpyna keledi, otadan keıingi aýyrsyný azaıyp, jaraqat az bolady», – dedi Manarbek Áýbákirov.
№4 qalalyq klınıkalyq aýrýhana – jedel jáne josparly hırýrgıalyq, travmatologıalyq, neırohırýrgıalyq jáne kardıohırýrgıalyq kómektiń tolyq sıklimen qamtamasyz etetin mamandandyrylǵan ortalyq. Qazirgi tańda aýrýhanada revızıalyq endoprotezdeý boıynsha sheberlik synyby da ótýde, onda juqpaly asqynýlar máseleleri talqylanýda. Bul aýrýhana iri býyndardy aýystyrý salasynyń flagmany bolyp tabylady. Jyl saıyn munda 2 myńǵa jýyq býyn aýystyrý otalary jasalady.
Sondaı-aq, S.D. Asfendıarov atyndaǵy QazUMÝ travmatologıa jáne ortopedıa kafedrasynyń profesorlyq-oqytýshylyq quramy men aýrýhananyń jetekshi dárigerleri sheberlik synybynyń negizgi spıkerleri boldy.
Aıta ketý kerek, buǵan deıin Tórtinshi qalalyq aýrýhanada jartylaı avtomatty júıesi bar robot synaqtan ótken bolatyn.