Qazaqta jeti atany bilýdiń mańyzy zor
Almatyda alǵash ret «Shejire» jas otbasy forýmy ótti, dep habarlaıdy Almaty-akshamy.kz Almaty.tv-ge silteme jasap.
«Bala degen amanat. Amanatqa qıanat jasamaý kerek». Osylaı degen sharaǵa qatysýshylar balalardy tiri jetim etpeı, tolyq otbasynda ósirý kerek. Al ajyrasqandary óz urpaǵynan qol úzbeýi qajet ekenin aıtty. Sondyqtan forýmda otbasy ınstıtýtyn durys qalyptastyrýdyń joldary talqylandy. Aıta keteıik, elimizde ótken jyly 48 myńnan asa adam ajyrasypty. Statısıkany basa nazarǵa alǵan sarapshylar jańadan otaý qurǵan otbasylardy demep, erli-zaıyptylar arasyndaǵy máselelerdi qalaı sheshýge bolatynyn kórsetti.
«Kúıbeń tirlikte kóp nárse umytylyp, «Otbasy kúni» merekesine mán de bermeımiz. Biraq ómirdiń máni – osy januıa ekenin umytpaýymyz kerek. Forýmdaǵy kelgenderdiń arasynda kópbalaly, jalǵyzbasty analar, ajyrasqan ákeler bar. Olar óz bastarynan ótken qıyndyqtardy, ony qalaı jeńgenderin bólisti. Jumys istep, kásip júrgizip júrip te jaqsy ata-ana, aıaýly jar bolýǵa bolady. Sony tájirıbe retinde kórsetkimiz keldi. Solardyń taǵdyryn estip, ómirinen sabaq alyp, qatelikterin jasamaýǵa sep bolsyn degen nıet bar», – dedi «Ákeler odaǵy» RQB múshesi Álıhan Musataev.
Forýmnyń «Shejire» dep atalýy beker emes. Óıtkeni qazaqta jeti atany bilýdiń mańyzy asa zor. Sondyqtan basqosýǵa kelýshilerge ata tekti aıqyndaıtyn týyndylar kórsetildi. Jıynǵa qatysqandar sońǵy ýaqytta shejirege qyzyǵatyndardyń qatary artqany qýantady deıdi.
«Bizdiń qazaqta shejire arqyly otbasylyq qundylyq saqtalǵan. Ol týǵannan bastap jeti atasyn aınytpaı kóbeıtý kestesindeı mindetti túrde qaıtalatyp otyrǵan. Genetıkterdiń aıtýy boıynsha, bul óte myqty dúnıe. Tuqym qýalaıtyn aýrý bolmaýy úshinprofılaktıkasy retinde jeti ataǵa deıin qyz alyspaý saltyn aıtyp júr. Sondyqtan shejireniń túbine kelgende bul birinshiden, ata-babamyzǵa qurmet. Ekinshiden, qan tazalyǵy», – dedi kásipker Nurgúl Ámire.