Almatyda áleýmettik osal toptardy qoldaý boıynsha aýqymdy jumys istelip jatyr. Az qamtylǵan otbasylarǵa, múgedektigi bar adamdar men áleýmetke qaıta beıimdeýdi qajet etetin azamattarǵa kóp kóńil bólinip otyr. Óńirlik komýnıkasıalar qyzmetinde ótken baspasóz máslıhatynda Jumyspen qamtý jáne áleýmettik baǵdarlamalar basqarmasynyń basshysy Baýyrjan Jaýbasov osylaı dep málimdedi.
Jyl basynan beri Almaty qalasynda 196 293 adam jalpy somasy 4,5 mlrd teńgege áleýmettik kómek aldy. Ataýly áleýmettik kómekpen 1 621 otbasy (8 126 adam) qamtyldy.
Múgedektigi bar adamdardy qoldaýǵa erekshe kóńil bólingen. Almatyda múgedektigi bar 59,3 myń adam turady. 2025 jylǵa osy sanattaǵy azamattardy qoldaýǵa 17,4 mlrd teńge qarastyrylǵan. Bul 2022 jylmen salystyrǵanda eki esege jýyq (7,9 mlrd teńge) kóp.
Jyl basynan beri tehnıkalyq ońaltý quraldary men qyzmetterin alý úshin 40 499 adam júgingen, onyń 27 048-i (66,8%) qajetti kómekti aldy. Jyl sońyna deıin bul kórsetkishti 95%-ǵa jetkizý josparlanyp otyr.
Qamtamasyz etý Áleýmettik qyzmetter portaly arqyly júzege asady. Qajetti qural bolmaǵan jaǵdaıda azamat ony satyp ta ala alady. Sonymen qatar, qymbat ınovasıalyq ońaltý quraldarymen qamtamasyz etý jumysy da júrgizilýde. Bul maqsatqa 1,4 mlrd teńge bólindi. 277 adamdy qamtamasyz etý josparlanyp, búgingi kúnge deıin 43 adam protez, arba, estý apparattary, sóıleý prosesorlary jáne basqa da kerekti quraldaryn alǵan.
«Invataksı» qyzmeti de damyp jatyr: 2025 jyly avtopark 100-den 145 kólikke deıin ulǵaıtyldy. Bul maqsatqa 1,4 mlrd teńge bólindi. Sonymen qatar, «Iandeks Taksı» agregatorymen birlesken pılottyq joba iske asa bastady. Sonyń arqasynda bul qyzmetti paıdalanatyndar sany 2 800 adamǵa artqan.
Qala keńistigin múmkindigi shekteýli jandarǵa beıimdeý boıynsha aýqymdy jumys júrgizilip jatyr. 2025 jyly 32,5 myń nysan (turǵyn úıler, kósheler, saıabaqtar men ǵımarattar) qujattaýdan ótedi. 2021 jyldan 2024 jylǵa deıin 4 257 nysan beıimdeldi, bıyl taǵy 1 277 nysan standartqa sáıkestendiriledi.
Búginde 3 504 múgedektigi bar adam arnaıy áleýmettik qyzmettermen qamtylǵan. Kómek kórsetetin barlyq 9 medısınalyq-áleýmettik mekeme men 13 úkimettik emes uıym lısenzıadan ótip, sıfrlandyrylǵan. Sonymen qatar, ÚEU múgedektigi bar balalar men ártúrli dertke shaldyqqan eresekterge memlekettik tapsyrys aıasynda qyzmet kórsetedi.
Almaty áleýmettik kómekti naqty ári tıimdi jetkizýdi jalǵastyryp, kómekke muqtaj jandarǵa qoldaýdy nyǵaıtýdy basty nazarda ustap otyr.