QR Qarjy naryǵyn retteý jáne damytý agenttiginiń málimetinshe, banktik shotty buǵattaýdyń sebepteri ár túrli, dep habarlaıdy aqshamnews.kz
"Buǵattaýdyń sebepteri ár túrli bolýy múmkin: tehnıkalyq aqaýlardan bastap, zańnamany buzý týraly kúdikke deıin", delingen QR Qarjy naryǵyn retteý jáne damytý agenttiginiń málimetinde.
Shotty buǵattaýdyń yqtımal sebepteri:
alaıaqtyq nemese ádetten tys operasıalarǵa kúdik (mysaly, qomaqty nemese jıi aýdarymdar, ásirese shetelden);
memlekettik organdardyń suraýy (salyq qyzmeti, sot oryndaýshylary, qarjylyq monıtorıń organdary) boıynsha buǵattaý;
bank júıesindegi tehnıkalyq irkilis nemese qate;
qate PIN-kod engizý;
kartanyń qoldanys merziminiń aıaqtalýy;
salyqtar, alımentter, kredıtter jáne basqa mindettemeler boıynsha bereshektiń bolýy;
shotty alaıaqtyq maqsatta paıdalanýǵa shaǵym.
Eger shot buǵattalsa, ne isteý kerek?
Eger siz shotqa kirýdiń shektelgenin bilseńiz, aldymen banktiń mobıldi qosymshasyndaǵy habarlamalardy tekserińiz – sebebi sol jerde jazylýy múmkin.
Tolyq aqparat alý úshin koll-ortalyq arqyly bankke nemese jaqyn jerdegi bólimshege habarlasyńyz. Qol jetkizýdi qalpyna keltirý úshin qandaı áreketter qajet ekenin naqtylańyz.
eGov.kz nemese salyq tóleýshiniń kabıneti arqyly yqtımal bereshektiń bolýyn tekserińiz. Qajet bolsa, qarajattyń paıda bolý kózin rastaıtyn qujattar daıyndańyz jáne usynyńyz.
Eger bank túsinikteme bermese nemese shara qoldanbasa, Siz Qarjy naryǵyn retteý jáne damytý agenttigine shaǵym túsire alasyz.
Buǵattalý qaýpin qalaı azaıtýǵa bolady:
kásipkerlik qyzmet úshin jeke shotty paıdalanbańyz;
bankti iri aýdarymdar jáne ózge de ádettegi operasıalarǵa uqsamaıtyn operasıalar jóninde aldyn ala habardar etińiz;
derbes derekterdiń ózektiligin jáne qujattardyń qoldanys merzimderin qadaǵalap otyryńyz;
bereshekterdiń bolýyn únemi tekserip otyryńyz jáne ýaqtyly óteńiz.