Almaty qalasynyń tarıhı ortalyǵynyń shekarasyn belgileý máseleleri basqarmanyń erekshe baqylaýynda.
Óńirlik komýnıkasıalar qyzmetiniń onlaın brıfıńinde Almaty qalalyq jer qatynastary basqarmasynyń basshysy Ardaq Samambetov atqarylyp jatqan sharalarǵa toqtaldy, dep habarlaıdy Almaty-akshamy.kz.
Ardaq Samambetov jýrnalıserge qala ákiminiń tapsyrmalary qalaı oryndalyp jatqandyǵyn aıtty.
«Núkteli qurylys salýǵa jol bermeý maqsatynda tarıhı ortalyqtyń shekarasy belgilendi, onyń sheginde memleket muqtajy úshin alyp qoıýǵa jáne satyp alýǵa jatatyn 7 ýchaske anyqtaldy. Olardyń ornynda abattandyrý, kógaldandyrý jumystary júrgiziledi. Qazirgi ýaqytta 4 jer telimi satyp alyndy», - dep málimdedi A.Samambetov.
Máselen, emhana salý maqsatynda Levıtan kóshesiniń ońtústiginen, Gagarın dańǵylynyń batysynan jer ýchaskesi tárkilendi. Sonymen qatar, halyqty sapaly medısınalyq qyzmetpen qamtamasyz etý úshin ál-Farabı dańǵylynyń ońtústigine qaraı jáne Syrǵabekov kóshesiniń shyǵysyna qaraı 500 kelýshige arnalǵan emhana salý úshin 1,3 gektar jer telimi bólindi.
Sonymen qatar, SHAAJ, ál-Farabı dańǵyly, Saın kóshesi, Jandosov kóshesiniń ońtústigine qaraı aýyl sharýashylyǵy maqsatyndaǵy jer telimderin bólýge jáne taý bókterinde az qabatty úıler salýǵa tyıym saldy.
ÓKQ brıfıńinde memlekettik jer qoryn ulǵaıtý maqsatynda jalpy aýdany 19,54 gektar 22 jer ýchaskesi rezervke qoıylǵany belgili boldy.
2022 jyldyń sońyna deıin Seıfýllın dańǵyly men Jansúgirov kóshesiniń qıylysynda kólik aıyryǵyn salý, sondaı-aq Saın kóshesin Rysqulov dańǵylynan Móńke bı kóshesine deıin tesý jáne Abaı dańǵylyn qala shekarasyna deıin tesý (Abaı saıajaılary) jobasy boıynsha jer telimderin satyp alýdy aıaqtaý josparlanýda.
Kelesi jyly JQB Medeý aýdanynda Rysqulov dańǵyly boıyndaǵy aınalmaly estakada qurylysyn salý, Iassaýı kóshesinen qala shekarasyna deıin Tóle bı kóshesin uzartý, F. Ońǵarsynova kóshesinen qala shekarasyna deıin Rysqulov dańǵylyn uzartý, Momyshuly kóshesinen qala shekarasyna deıin Jubanov kóshesin uzartý jáne metropolıten salý («Qalqaman» stansıasy) jobalary boıynsha jer telimderin satyp alýdy aıaqtaýdy josparlap otyr.