Oqýshylar saraıynda «Qazaqstandaǵy balalar úıleri túlekteriniń qaýymdastyǵy» zańdy tulǵalar birlestigi men qalalyq Bilim basqarmasynyń uıymdastyrýymen áleýmettik mekemelerde tárbıelenip jatqan balalarǵa arnalǵan merekelik is-shara ótti. Oǵan Almaty qalasynyń ártúrli áleýmettik mekemelerinen kelgen 400-den astam bala qatysty. Olardyń qatarynda «Meıirim», «Januıa» balalar ortalyqtary, SOS balalar aýyly jáne «Baǵanashyl» balalar úıiniń tárbıelenýshileri bar. Jańa jyldyq shyrsha bıyl toǵyzynshy ret ótkizilip otyr.
Qazir bul is-shara ata-ananyń qamqorlyǵynsyz qalǵan balalar úshin jyl saıyn asyǵa kútetin mańyzdy merekege aınaldy. Óıtkeni, munda konserttik qoıylymdar, oıyn-saýyq baǵdarlamalary uıymdastyrylyp, barlyq balaǵa jańa jyldyq syılyqtar tabystaldy. Uıymdastyrýshylardyń aıtýynsha, is-sharanyń ótýine Almaty qalasynyń Qoǵamdyq keńesi, sondaı-aq halyqaralyq uıym ókilderi de qoldaý kórsetken.
«Bul jańa jyldyq shyrsha – áleýmettik mekemelerde tárbıelenip jatqan balalardyń asyǵa kútetin merekeleriniń biri. Bir-birimen erkin aralasyp, shat-shadyman kóńil kúıde merekeni atap ótedi», – dedi Almaty qalasy Bilim basqarmasy basshysynyń orynbasary Bıbigúl Tólepbergenova.
«Men Jańa jyl men Naýryzdy óte jaqsy kóremin. Búgin bári qatty unady. Ásirese, úlken ári ádemi shyrsha men syılyqtar keremet boldy», – dep «Baǵanashyl» balalar aýylynan kelgen Ajar Kenganova áserin bólisti.