Almatynyń eń tanymal oryndarynyń biri – Astana alańynda basty jańajyldyq konsertke daıyndyq aıaqtalýǵa jaqyn. Qazaqstan estradasy juldyzdarynyń óner kórsetýi úshin zamanaýı sahna ornatylyp, kásibı dybys jáne jaryq júıeleri tolyqtaı ázirlendi.
Saǵat 18:00-den bastap almatylyqtar men qala qonaqtaryna otandyq óner ıeleri merekelik kóńil kúı syılaıdy. Sahnada Maqpal Isabekova, Álisher Kárimov, Aqylbek Jemeneı, Beıbit Qorǵan, Dáýlet Janbolat, Jubanysh Jeksenuly, Dıana Ismaıl, Baqyt Shadaeva, Abaı Begeı, Tahmına Áshimbekova, İnjý Ánýarbek, Ábik Jeksen, Asqat Tarǵyn, Dálel Ýashev, Maqsat Bazarbaev, Dáýren Baıbóri óner kórsetedi. Sonymen qatar Ringo, Ninety One, Ayree, Astra, Dakelot, Muzart Life toptary da konserttiń kórkin qyzdyrmaq.
Konsert baǵdarlamasynyń erekshe bóligi DJ BATTLE bolmaq. Batl barysynda dıdjeıler jańajyldyq áýender men tanymal hıtterdiń zamanaýı óńdelgen avtorlyq mıksterin usynyp, keshke aıryqsha serpin men merekelik kóńil kúı syılaıdy.
Astana alańy konsert bastalmaı turyp-aq halyqqa lyq tola bastady.
– Biz merekeni asyǵa kútip otyrmyz, otbasymyzben birge jańajyldyq konsertti tamashalaýǵa keldik. Eger keshti Aıaz ata men Aqshaqar ashsa, tipti tamasha bolar edi, – deıdi Rahmetovter otbasynyń ókilderi. Anasy Baljan Aqtaýdan kelgen, al ony qyzy Aınur eki balasymen birge ertip júr. Olar alańǵa aldyn ala kelip úlgergen.
Almatydaǵy basty jańajyldyq shoýda qazaqstandyq artıserdiń óner kórsetýi 1 qańtar kúni saǵat 00:30-da máresine jetedi.