Almaty qalalyq mobıldilik basqarmasy Ál-Farabı dańǵylynda jol jóndeý jumystary júretin kelesi ýchaskeni málim etti.
Vedomstvonyń málimetinshe, Ál-Farabı dańǵylynyń ońtústik jaǵyna polımerli asfáltty betondy tóseý jumystary aıaqtaldy. Soltústik jaǵynda Dostyq dańǵylynan Esentaı ózeni arqyly ótetin kópirge deıingi ýchaskede jóndeý jumystary júrgizilip, qazir kólik qozǵalysy ashylǵan, dep habarlaıdy Almaty-akshamy.kz.
Endi Esentaı ózeni arqyly ótetin kópirden Qojanov kóshesine deıingi aralyqta ortasha jol jóndeý jumystary ótedi.
1 tamyz kúngi saǵat 23:00-den 3 tamyz kúngi tańǵy 07:00-ge deıin dańǵyldyń soltústik jaǵyndaǵy kólik qozǵalysy tolyǵymen jabylady.
2 tamyz kúngi saǵat 07-00-den 3 tamyz kúngi 00-00-ge deıin Esentaı ózeni arqyly ótetin kópirden Syrǵabekov kóshesine deıingi aralyqtaǵy Ál-Farabı dańǵylynyń ońtústik jaǵynan reversıvti qozǵalys ashylady.
Batys jáne shyǵys baǵyttaǵy jolaqtardyń sanyn patrúldik polısıa qyzmetkerleri kólik qozǵalysy jaǵdaıyna baılanysty anyqtaıdy.
3 tamyzda túngi saǵat 00-00-den tańǵy 07-00-ge deıin Ál-Farabı dańǵyly boıymen batys baǵyttaǵy (Esentaı ózeni arqyly ótetin kópirden bastap) kólik qozǵalysy tolyǵymen jabylady.
1 tamyz kúngi saǵat 23:00-den 3 tamyz kúngi 07:00-ge deıin Botanıkalyq baq pen Qozybaev kóshesine kiretin jáne shyǵatyn jol, sondaı-aq Ál-Farabı dańǵylynan Qojanov kóshesine shyǵatyn jol shekteledi.
«Osyǵan baılanysty Jarokov, Qojanov jáne Qozybaev kóshelerinen aınalma jol qarastyrylady.
Jol jabyq kezde Qojanov kóshesinen Ál-Farabı dańǵylyna ótetin batys baǵyt ashyq bolady.
Jol qozǵalysyna qatysýshylardyń qaýipsizdigin qamtamasyz etý úshin patrúldik polısıanyń 6 brıgadasy jumys isteıdi. Sondaı-aq qozǵalys jyldamdyǵyn saǵatyna 40 shaqyrymǵa shekteý belgileri ornatylyp, konýs pishindegi jaryqta shaǵylystyrýshy fıshkalar arqyly jol jolaqtary bólinedi», - dep habarlady Almaty qalalyq mobıldilik basqarmasy.