Almatyda ál-Farabı dańǵylynyń bólý jolaǵy boıyna 300-ge jýyq jańa aǵash otyrǵyzyldy – qaladaǵy basty magıstraldiń birin 292 iri shegirshin men shaǵan aǵashy sándendirdi. Bul týraly Ekologıa jáne qorshaǵan orta basqarmasy habarlady.
Aǵashtardyń bıiktigi – keminde alty metr. Olar jergilikti tálimbaqtarda ósirilgen jáne megapolıstiń klımattyq jaǵdaıyna beıimdelgen. Mamandardyń aıtýynsha, bul aǵash túrleri kezdeısoq tańdalmaǵan: shegirshin men shaǵan aýanyń lastanýyna, temperatýranyń aýytqýyna tózimdi ári aýany tıimdi tazarta alady.
«Bul aǵashtar jol boıynda jaıly jasyl aımaq qalyptastyryp qana qoımaı, kólik qozǵalysynan bolatyn lastaný deńgeıin tómendetýge kómektesedi. Durys kútim jasalsa, tez beıimdelip, qalanyń landshafttyq mańyzdy bóligine aınalady», – dedi «Botanıka jáne fıtoıntrodýksıa ınstıtýty» RMK bas dırektory Gúlnár Sıtpaeva.
Turaqty sýarý, jaz maýsymda mıneraldy tyńaıtqyshtar engizý jáne kúzgi-qysqy kezeńde mamandardyń usynystaryna sáıkes arnaıy kútim jasaý syndy aǵashtyń tez tamyrlanýy úshin keshendi kútim sharalary josparlanǵan.
Almatyda kógaldandyrý jumystary «Taza Qazaqstan» respýblıkalyq baǵdarlamasy jáne «Almaty – bizdiń ortaq úıimiz» qalalyq bastamasy aıasynda belsendi júrgizilýde. Bıyl naýryz aıynda Saın, Rysqulov, Sátbaev kóshelerinde, Kókjıek shaǵyn aýdanynda, Gúlder saıabaǵynda jáne basqa da qoǵamdyq oryndarda 2 000-ǵa jýyq iri kóshet otyrǵyzý josparlanǵan. Qazirgi tańda 600-den astam aǵash egildi.