Almatyda Aıaz ata sherýi ótti. Ertegi áleminiń keıipkerleri qalanyń ortalyq kóshelerimen júrip ótip, megapolıs turǵyndary men qonaqtaryn kele jatqan Jańa 2024 jylmen quttyqtady.
Basty jańa jyldyq shyrsha ornatylǵan Abaı alańynan bastap, sherý Dostyq dańǵylymen Qabanbaı batyr kóshesine deıin, sodan keıin batys baǵytta Panfılov kóshesine deıin júrip, «Astana» alańyna bardy. Marshrýttyń sońǵy núktesi beker tańdalmaǵan, dál osy jerde 31 jeltoqsanda basty jańa jyldyq konsert ótedi, sodan keıin jańa jyldyq otshashýdy bastalady.
«Biz balalarǵa jaqsy kóńil-kúı men umytylmas emosıa syılaı alǵanymyzǵa qýanyshtymyz. Qala turǵyndary men qonaqtary sherýge qatysýshylarmen sýretke túsip, suraqtarǵa jaýap berip, óleńder aıtyp, syılyqtar, táttiler aldy. 60 adamnan turatyn Aıaz ata sherýin biz ekinshi jyl qatarynan ótkizip kelemiz jáne bul jańa jyl qarsańynda jaqsy dástúrge aınalyp otyr», — dedi Almaty qalasynyń mádenıet basqarmasy.
Aıta keteıik, 21 jeltoqsannan bastap Abaı atyndaǵy alańda jáne Astana alańynda kún saıyn belgili ártisterdiń, live-bendter men dıdjeılerdiń qatysýymen konsertter, túrli balalar baıqaýlary, anımatorlarmen oıyndar men ınteraktıvter ótkiziledi. 27-31 jeltoqsan aralyǵynda Jańa jyldyq Qysqy festıvál aıasynda qalanyń ár aýdanynda konsertter uıymdastyrylady, onda Kenjebek Janábilov, Móldir Áýelbekova, Ómirqul Aınıazov, Álisher Qonysbaev, Raıym Ýaıs, Abaı Begeı, Asqat Tarǵyn, Altair & Abbi, Nurmuhammed Jaqyp, Muhtar Hanzada, Nursultan Nurberdıev, Aqbota-Nur, Jandos Qarjaýbaı, Jiger Aýypbaev, Serik Ibragımov, Altynbek Táshimbetov jáne t.b. artıser óner kórsetedi.