Sotqa deıingi tergeý bastaldy.
Almatyda kólik urysy adam ólimine ákep soqqan apatty jasady, dep habarlaıdy Almaty-akshamy.kz Polisia.kz-ke silteme jasap.
PD Anyqtaý basqarmasynyń habarlaýynsha, buryn birneshe ret sottalǵan 22 jastaǵy R. esimdi azamat "Aqsaı" yqshamaýdanyndaǵy úılerdiń biriniń aýlasynan Mazda kóligin urlap ketken, sodan keıin taǵy birneshe qylmys jasaǵan.
«Dálirek aıtsaq, Alataý aýdanyndaǵy turǵyn alabynda qaskóı túngi ýaqytta úsh kóliktiń akýmýlátorlaryn urlap ketken. Al tańǵy altyda ol adam ólimine ákep soqqan apatqa ushyrady. Kólik urysy Saına kóshesimen soltústik baǵytta kele jatyp Abaı dańǵylymen qıylysqanda Toyota Corolla jáne Kia Rio kólikterimen soqtyǵysqan. Soqqy saldarynan Kia Rio ınersıamen kedergige soqty. Bul kólikti 52 jastaǵy er adam basqarǵan. Ókinishke oraı, ol alǵan jaraqattarynan oqıǵa ornynda kóz jumdy», – dedi Almaty qalalyq PD Anyqtaý basqarmasynyń bastyǵy Oljas Sháripov.
Kólik urysyn patrúldik polısıa qyzmetkerleri qolǵa túsirdi. Belgili bolǵandaı, Mazda kóliginiń ıesi óz kólik quralynyń urlanǵanyn bilmegen: kóliktiń óz úıiniń aýlasynda ekenine senimdi bolǵan.
«Adam ólimine ákep soqtyrǵan jol-kólik oqıǵasyna qatysty QR QK-niń 345-baby 3-bóligine (Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy) sáıkes, sotqa deıingi tergeý bastaldy. Tergeý sonymen qatar, bóten kólikti zańsyz ıelený, bótenniń múlkin urlaý derekteri boıynsha da júrgiziletin bolady. Kúdikti QR QPK-niń 128-babyna sáıkes ýaqytsha ustaý ızolátoryna qamaldy», – dedi Sháripov.