Tańsyq portretter galereıasy jyl saıyn jańa beınelermen tolyqtyrylýda
Búgin QR Ulttyq kitaphanasynyń 1-qabattaǵy foıesinde Qazaqstan Respýblıkasy Sýretshiler odaǵynyń múshesi, zamanaýı sýretshi Tańsyq Májıtovanyń «Adam. Dáýir. Ýaqyt» atty shyǵarmashylyq kórmesiniń ashylý saltanaty ótti, dep habarlaıdy Almaty-akshamy.kz.
İs-sharany Qazaqstannyń eńbek sińirgen qaıratkeri, Memlekettik syılyqtyń laýreaty, «Parasat» ordeniniń ıegeri, kórnekti prozashy Asqarov Álibek Asylbaıuly ashyp, Smaǵul Elýbaı, Qalı Sársenbaı, Arman Halbekov lenta qıý rásimine qatysty.
Tansyq Májıtova ─ QR Sýretshiler Odaǵynyń múshesi, Adam men qoǵamnyń ózara is-qımylyn beıneleıtin qyzyqty zamanaýı sýretshi. Jıyrma jyldan astam «Adam. Dáýir. Ýaqyt» atty jobamen aınalysady. Osy joba eldiń saıası, ekonomıkalyq, rýhanı ómiriniń mańyzdy jaqtaryn ashady. Sýretshi Qazaqstannyń kórnekti saıası qaıratkerleriniń, jazýshylarynyń, medısına, ǵylym, mádenıet jáne sport ókilderiniń portrettik galereıasyn jasaıdy. Olardyń ishinde: Á.Nurpeıisov, Á.Kekilbaev, F.Ońǵarsynova, G.Belger, D.Isabekov, O.Súleımenov, B.Aıýhanov, T.Áýbákirov, J.Úshkempirov, J.Málibekov, Iý.Pá, E.Hasanǵalıev, A.Áshimov sıaqty tulǵalar bar... Sheberdiń aldyna qoıǵan mindeti – jeke tulǵanyń ishki álemin jetkizý, irgeli sıpattarǵa basa nazar aýdarý.
Osy joba aıasyndaǵy alǵashqy kórme 2011 jyly Elordada ótti. Tańsyq portretter galereıasy jyl saıyn jańa beınelermen tolyqtyrylýda. 10 jyldan keıin, 2021 jyly Astanada, sodan keıin Qaraǵandyda 50-ge jýyq portret kórsetildi.
Bul joba ıdeıasynyń avtory: ónertanýshy Ivanına Natalá Ivanovna. Ol Tansyqtyń psıhologıalyq portrettiń sheberi retindegi talantyn kórip, zamandas beınesiniń tamasha galereıasyn jasaýǵa ıtermelegen. Al jobanyń ózgermeıtin kýratory: jazýshy, polıgrafıst Asqarov Álibek Asylbaıuly sýretshiniń erekshe darynyn tolyq ashýǵa múmkindik berdi.
Adamnyń rýhanı bolmysyna ene bilýi - Tańsyq talantynyń mańyzdy qyry.
«Adam. Dáýir. Ýaqyt» jobasy osy myńjyldyq basyndaǵy Qazaqstannyń ólsheýsiz rýhanı baılyǵy, bolashaqqa umtylǵan psıhologıalyq portretine aınaldy.