Almaty qalalyq mamandandyrylǵan aýdanaralyq qylmystyq soty adam aǵzalaryn zańsyz satyp alý jáne satý isimen aınalysqan azamatqa úkim shyǵardy.
2023 jyldyń kúzinde uıymdasqan qylmysqa qarsy kúres qyzmetkerleri eldiń birneshe óńirinde arnaıy jedel tergeý júrgizdi, dep habarlaıdy aqshamnews.kz.
Nátıjesinde, qara naryqta adam aǵzalaryn satýmen aınalysqan top ustaldy. Olardyń arasynda donor izdeýshiler ǵana emes, medısına qyzmetkerleri men notarıýstar da bolǵan. Alaıda ustalǵan kúdiktilerdiń ishinde tek eki adam ǵana sotqa tartylyp, olar shartty jazaǵa kesildi.
Búırek jetkiliksizdigine shaldyqqan Islam Uzaqbaı 2021 jyly Túrkıada búırek transplantasıasyn jasatqan. Almatydaǵy medısınalyq ortalyqta em qabyldap júrgen kezde, ol naýqastarǵa donor taýyp berý arqyly aqsha tabýǵa bolatyndyǵyn oılaǵan. Bul isti jalǵyz ózi júzege asyra almaıtynyn túsingen soń, tergeýde anyqtalmaǵan "Aıman" esimdi adammen baılanysqa shyqqan.
Uzaqbaı gemodıalız kezinde búırek transplantasıasyna muqtaj naýqaspen tanysyp, oǵan donor tabýǵa kómektesetinin aıtyp, 10 mıllıon teńge talap etken. Bastapqyda jigit bul usynysty qabyldamaǵanymen, Uzaqbaı oǵan jıi habarlasyp, senimine kirgen. Naýqastyń jaǵdaıy nasharlaǵan soń, onyń týystary transplantasıa jasaýǵa kelisim beredi. Uzaqbaı operasıany resmı túrde kvota arqyly jasaýǵa ýáde berip, 10 mıllıon teńge suratqan.
Osy ýaqytta "Aıman" esimdi áıel ınternet arqyly Astanada búıregin 8 mıllıon teńgege satýǵa kelisken adamdy tapqan. Ol donorǵa Almatydaǵy Syzǵanov atyndaǵy Ulttyq ǵylymı hırýrgıa ortalyǵynda operasıa jasatýǵa ýáde bergen. Tekserýden keıin operasıa sátti ótken, alaıda Uzaqbaı naýqastan donorǵa taǵy 10 mıllıon teńge tóleýdi talap etken. Osylaısha, alǵashqy klıent jalpy 20 mıllıon teńge tólegen.
Bul istiń tıimdi ekenin túsingen Uzaqbaı taǵy bir naýqas pen donor taýyp, Ulttyq ǵylymı hırýrgıa ortalyǵynda operasıa jasatýdy josparlap jatqanda ustalǵan. Sot sheshimi boıynsha, ol 4 jylǵa shartty túrde bas bostandyǵynan aıyryldy. Búıregin satpaq bolǵan donor da kináli dep tanylyp, 2 jylǵa shartty jazaǵa kesildi.