Byltyr «Abaı» baspasynan shyqqan 35 kitaptyń tusaýkeseri ótkende baspa ujymynyń «aldaǵy 2024 jyly qazaqtyń kórkem ádebıet týyndylaryn 100 tomdyqqa jetkizemiz» degen ýádesi bar edi. Bıyl baspa sol ýáde údesinen shyǵyp, 100 emes, 155 kitap basyp shyǵardy.
Baspadan qazaq ádebıetiniń klasık aqyn-jazýshylarynyń shyǵarmalarynan jasaqtalǵan biregeı týyndylarmen qatar, balalar men jasóspirimderge arnalǵan shyǵarmalar da jaryq kórgen. Baspa tek qana kórkem ádebıet salasynda ǵana emes, ǵylymǵa da kóńil bóle otyryp, ońaılyqpen qolǵa túse bermeıtin, izdegenge taptyrmas akademıalyq zertteý eńbekterimen tolyǵa túsken.
Sondaı-aq kórkem ádebı kitaptardan bólek, bıyl baspadan dinı-rýhanı baǵyttaǵy, tarıh salasyndaǵy, salt-dástúr, aýyz ádebıetiniń jaýharlary jaryq kórip otyr. Olar: «Uly tarıh jáne Uly áýlıeler», «Uly dala tarıhy», «Taraz — órkenıetter órimderiniń kýágeri», «Qarahan baba men Aısha bıbi», «Altybarmaq», «Turmys salt jyrlary», «Batyrlyq jyr dastandar», «Lıro-epostyq jyrlar», «Turmys salt ertegileri», «Ańyz-áńgimeler», «Qıal-ǵajaıyp ertegiler», «Aýyz ádebıetiniń shaǵyn túrleri», «Haıýanattar týraly ertegiler» jáne taǵy basqalar.
— «Abaı» baspasynan jaryq kórgen kórkem ádebıet kitaptarynyń kóshin Dýlat Babataıuly, Hákim Abaı, Shákárim, Máshhúr Júsip Kópeıuly bastap, Muhtar Áýezov, Alashorda qaıratkerleriniń shyǵarmalary men Keńes Odaǵy zamanynyń áıgili qalamgerleri jalǵastyryp otyr. Sonymen qatar, baspa oqyrmannyń sóresin Táýelsiz Qazaqstannyń kórnekti jazýshylary men belgili jas avtorlardyń shyǵarmalarymen tolyqtyrdy. 155 kitap ta álemdik suranysqa saı, zamanaýı úlgide, boıaýy qanyq dızaında jaryq kórdi. Olar qalyń oqyrman talǵamynan shyǵyp, kitapsúıer qaýymdy qýantady dep senemiz, — dedi belgili qalamger, “Abaı” baspasynyń dırektory Aqberen Elgezek.