Almatyda qazaqtyń uly aqyny, oıshyl ári aǵartýshy Abaı Qunanbaıulynyń 180 jyldyǵyna arnalǵan aýqymdy baǵdarlama bastaldy.
Tamyz boıy qalada 120-dan asa is-shara josparlanǵan. Olardyń qatarynda – teatr qoıylymdary, poezıa keshteri, ádebı saǵattar, kórmeler, konsertter, jastarmen kezdesýler, sondaı-aq sporttyq, qaıyrymdylyq jáne aǵartýshylyq aksıalar bar.
Mereıtoıdyń basty saltanaty 10 tamyzda – Abaıdyń týǵan kúninde ótedi.
Saǵat 10:00-de Respýblıka saraıynyń aldyndaǵy Abaı alańynda uly aqynnyń eskertkishine gúl shoqtaryn qoıý rásimi ótedi.
Al saǵat 12:00-de dál osy alańda "Alashtyń Abaıy" atty mýzykalyq-dramalyq konsert uıymdastyrylady. Konsertke Asanáli Áshimov, Tuńǵyshbaı Jamanqulov, Saıat Merekeuly, Roza Rymbaeva, Aıgúl Qosanova jáne ózge de tanymal óner ıeleri qatysady. Baǵdarlamada – Abaı shyǵarmalarynan shabyttanǵan teatrlandyrylǵan kórinister, poezıa, vokaldyq jáne aspaptyq nómirler usynylady.
İs-sharalar qalanyń barlyq segiz aýdanynda ótedi.
Máselen, 8 tamyzda saǵat 11:00-de №6 kitaphanada "Ólmeıtuǵyn artyna sóz qaldyrǵan" atty poezıa keshi ótedi. Jazýshy Nurdáýlet Aqysh pen aqyn-fılosof Murathan Shoqan Abaıdyń búgingi qoǵamdaǵy róli jaıly oı bólisedi.
Sol kúni Qazaqstan jazýshylary kitaphanasynda "Asyl sózdi izdeseń, Abaıdy oqy, erinbe" atty dóńgelek ústel uıymdastyrylady.
S.Muqanov pen Ǵ.Músirepovtiń ádebı-memorıaldyq mýzeıinde saǵat 15:00-de "Jarqyn juldyzdar" eńbegi negizinde Abaı shyǵarmashylyǵyna arnalǵan materıaldar usynylady.
9 tamyzda saǵat 15:00-de Dinmuhamed Qonaevtyń memorıaldyq mýzeıinde "Uly Abaı" atty dáris ótedi. Onda aqyn beınesi tarıhı jáne ádebı kontekste saralanady.
10 tamyzda 10:00-de Mahatma Gandı atyndaǵy saıabaqta №4 kitaphana-fılıal "Júregimniń túbine tereń boıla" atty art-kompozısıa ótkizedi. Baǵdarlamada – ádebı oıyndar, óleń oqý, Abaı ánderin oryndaý, sondaı-aq "Ǵalamnyń jyr danasy – Uly Abaı" atty kórme usynylady.
28 tamyzda saǵat 19:00-de Respýblıka saraıynda "Abaıǵa taǵzym" atty merekelik konsert ótedi. Qoıylym Abaıdyń rýhanı jolyn mýzyka, teatr jáne bıdi biriktire otyryp sahnalaıdy.
Qyrkúıekte Memlekettik qýyrshaq teatrynda "Men bir jumbaq adammyn… Abaı" spektakliniń premerasy ótedi (jas shekteýi: 16+). Qoıylym Muhtar Áýezovtiń "Abaı joly" romany men "Qara sózderi" negizinde sahnalanyp, aqynnyń ishki jan dúnıesin, parasaty men rýhanı tereńdigin ashady.
Barlyq is-shara azamattardy, ásirese, jastardy ulttyq mádenıetke jaqyndatýǵa, qazaq ádebıetine degen qyzyǵýshylyqty arttyrýǵa jáne Abaı Qunanbaıulynyń rýhanı murasyn tereń uǵynýǵa baǵyttalǵan. Abaı tulǵasy adamgershilik pen aǵartýshylyqtyń, jandy qazaq oıynyń sımvoly.