Búgin Abaı Qunanbaıulynyń dúnıege kelgenine 178 jyl toldy. Almatyda uly tulǵanyń ataýly kúnin resmı atap ótý Abaı eskertkishine gúl shoqtaryn qoıýmen bastaldy, dep habarlaıdy almaty-aqshamy.kz.
Abaı kúnine arnalǵan resmı ish-sharalardyń bastaýyna birqatar zıaly qaýym ókilderi men máslıhat depýtattary jáne qala turǵyndary jınaldy. Olar Abaı eskertkishiniń aldyna uly tulǵanyń rýhyna taǵzym etip, gúl shoqtaryn qoıdy.
Qazaqstan Jazýshylar odaǵynyń tóraǵasy Mereke Qulkenov bastap merekelik quttyqtaý sózin sóıledi. Qalamgerler atynan sóz alǵan M.Qulkenov: «Mynaý, uly tulǵaǵa arnalǵan kórkem týyndy Abaıdyń 115 jyldyǵynda qoıylǵan edi. Osymen birge Almatyǵa Abaıdyń rýhy kelip qondy. Bıyl buǵan 63 jyl tolǵan eken. Abaı ózi Jıdebaıda tuǵanymen ár qazaq óz jerinde, Mańǵystaýda, Taldyqorǵanda, Kókshetaýda «Abaı bizdiń aqynymyz» dep maqtan tutady. Týǵan kúnin dúbirletip toılaıdy. Ol óz zamanynda alǵash ret halyqty tolǵandyrǵan qoǵamdyq jáne saıası ómirdiń problemalaryn qozǵady. Qoǵamnyń qaıshylyǵymen birge zamandastarynyń berekesizdigin, otarlyq saıasattyń zıanyn synaı otyryp, halyqqa ish tartty. Elin ozyq mádenıetke qaraı jeteledi», – dedi.
Abaı kúnine oraı resmı is-sharalardyń jaıyn suraǵanymyzda Almaty qalasy Mádenıet basqarmasynyń basshysy Ǵanı Maılybaev bylaı dedi: «Ózderińiz biletindeı, aıtýly merekeni Almaty jurtshylyǵy, jyl saıynǵy dástúrine saı, eskertkishke gúl shoǵyn qoıýdan bastap jatyr. Oǵan zıaly qaýym ókilderi, qalalyq máslıhattyń depýtattary, mádenıet jáne qoǵam qaıtartkerleri de qatysýda. Aıta keteri, eskertkishke gúl shoǵyn qoıýmen bastalǵan mereke ortalyq qalalyq kitaphanadaǵy úlken dógelek ústelge, odan keıin «Alataý» dástúrli óner teatryndaǵy merekelik konsertke ulasady», – dedi.
Sonymen birge, Ǵanı Maılybaev Abaı shyǵarmalaryna, rýhanı muralaryna arnalǵan konserttik sharanyń qala turǵyndary úshin tegin ekenin de eskertti.
Qazaqtyń uly tulǵasy, ultymyzdyń adamzat rýhanı qazynasyna qosqan úlesi sanalatyn Abaı Qunanbaevtyń týǵan kúni 2020 jyly 5 tamyzda resmı merekelik kún retinde bekitilgen bolatyn. Sodan beri bul kún respýblıkamyzdyń jer-jerinde atalyp ótilýde.
