Almatyda Abaı dańǵylyn qala shekarasyna deıin uzartý jumystaryna baılanysty kólik qozǵalysyna ýaqytsha shekteýler engiziledi, dep habarlaıdy aqshamnews.kz
Atap aıtqanda, asfáltobeton jamylǵysynyń joǵarǵy qabatyn tóseý jumystaryna baılanysty 20 mamyr kúni saǵat 23:00-den bastap 23 mamyr kúni saǵat 16:00-ge deıin Abaı dańǵylynyń Alataý kóshesinen Stroıtelnaıa kóshesine deıingi bóligi boıynsha kólik qozǵalysy shekteledi. Aýmaqty Alataý kóshesi arqyly soltústik jáne ońtústik baǵytta aınalyp ótýge bolady.
Sonymen qatar, 22 mamyr saǵat 23:00-den 27 mamyr saǵat 16:00-ge deıin Q.Medeýbekov kóshesi (Karernaıa kóshesi) qıylysyndaǵy qozǵalysqa shekteý qoıylady. Bul ýchaskeni ońtústik jaqtan Ý.Qaramanov, Grýshovaıa, Vınogradov kósheleri arqyly, sondaı-aq, Stroıtelnaıa kóshesimen soltústik jáne ońtústik baǵytta aınalyp ótýge bolady.
Esterińize sala keteıik, Abaı dańǵylyn qala shekarasyna deıin uzartý jobasy osy jyly tolyq ashylady dep josparlanyp otyr. Qazirgi tańda 600 metrlik sońǵy bólik boıynsha jumystar júrgizilip jatyr. Jalpy uzyndyǵy – 5,3 km.
Aıta keteıik, qozǵalysty shekteý týraly barlyq aqparat @AlmatyJoly Telegram arnasynda, qala ákimdiginiń áleýmettik jelilerinde, sonymen birge 2GIS jáne «Iandeks.Kartalar» servısterinde jarıalanǵan.
