Qalada turaqty tirkeýi bar kámeletke tolǵan Almatynyń kez kelgen turǵyny aýdanyn, kóshesin nemese aýlasyn kóriktendirý jóninde ótinim usyna alady. Eger bastamany basqa turǵyndar daýys berý arqyly qoldasa, onda ol qalalyq búdjet esebinen júzege asyrylady.
Almaty aýdandarynyń aýmaǵyn damytý jáne kóriktendirý boıynsha ótinim qabyldaý 9 qyrkúıekte bastalyp, 25 qyrkúıekke deıin jalǵasady. Saraptamalyq keńestiń baǵalaýynan ótken jáne daýys berýde kósh basynda bolǵan jobalardy Almatynyń aýdandyq ákimdikteri 2025 jyly iske asyrady.
Qala turǵyndary usynysyn budget.open-almaty.kz ınternet-portaly arqyly jibere alady. Ótinimde jobalyq usynystyń ataýy men sıpattamasy, ornalasqan jeriniń mekenjaıy, boljaldy fotosýretterdi, sqema nemese eskızdi, jobalyq usynystyń smetasy bolýǵa tıis. Bir ótinim 92,3 mln teńgeden (25 myń AEK) aspaýy kerek.
«Halyq qatysatyn bıýdjet» jobasy 8 kezeńnen turady: ótinim qabyldaý, saraptamalyq baǵalaý, avtorlardyń jobalardy pysyqtaýy, pysyqtalǵan usynystardy qaraý, daýys berý, daýys berýdi qorytyndylaý, búdjettik ótinimdi qalyptastyrý, jobalardy iske asyrý.
HQB aıasynda ne usynýǵa bolady?
Jobalyq usynystar toǵyz sanat boıynsha qabyldanady:
· kógaldandyrý
· trotýarlardy jaılastyrý
· trotýarlardy, pandýstardy, aryqtardy salý jáne jóndeý
· jalpy paıdalanym oryndaryn qurý, jóndeý jáne jaryqtandyrý
· jıektastardy, tósenishterdi, tireý qabyrǵalaryn jóndeý
· polıgondardy joıý
· balalar oıyndary men eresekterdiń demalýy úshin, jalpy paıdalanym oryndarynda kúrkelerdi, oryndyqtardy, qoqys jáshikterin, jabdyqtar men qurylymdardy ornatý jáne jóndeý
· aýla aýmaqtarynda jáne jalpy paıdalanym oryndarynda sport alańdaryn, balalar oıyn alańdaryn ornatý, jóndeý jáne jaryqtandyrý
· sanıtarlyq tártipti qamtamasyz etý
İrikteýdi ótkizý tártibi jáne jobalarǵa qoıylatyn talaptar:
· Bir avtordan – bir ótinim – bir nysan
· nysan qoljetimdilikti shektemeı, jalpy paıdalanymda bolýy kerek.
· nysan ony iske asyrý josparlanyp otyrǵan aýdan aýmaǵynda, ortaq paıdalanylatyn jerde jáne ákimdiktiń jáne komýnaldyq qyzmetterdiń quzyreti sheginde ornalasýǵa tıis
Qandaı jobalar qabyldanbaıdy?
· qurylys-montaj jumystaryn júrgizbesten JSQ (jobalaý-smetalyq qujattama) ázirleýge ǵana eseptelgen
· fragmenttik (bolashaqta qosymsha elementterdi engizýdi talap etedi)
· Almatynyń damý baǵdarlamasyna jáne QR zańnamasyna sáıkes kelmeıtin
· komersıalyq sıpattaǵy jáne t.b.
Ótinim qabyldaý merzimi aıaqtalǵan soń saraptamalyq keńes pen aýdan ákimdikterdiń ókilderi kelip túsken ótinimderdi olardyń sanatynda kózdelgen «Halyq qatysatyn búdjettiń» talaptary men ólshemsharttaryna sáıkestigi turǵysynan nobaı men boljamdy smetanyń bolýyna qaraı baǵalaıdy.
Qaralǵannan keıin árbir ótinimge myna úsh mártebeniń biri beriledi: «Daýys berýge jiberildi», «Túzetýge jiberildi» nemese «Qabyldanbady».
«Halyq qatysatyn búdjettiń» barlyq erejesine sáıkes resimdelgen ótinim maquldanady jáne daýys berý kezeńine jiberiledi.
Túzetýge baǵyttalǵan usynystyń avtory jobasyn túzetýge jáne ótinimdi qaıta qaraýǵa jiberýge múmkindik alady.
Jobanyń qazirgi kezeńi/kúıi týraly habarlamany paıdalanýshynyń jeke kabınetinen kórýge bolady.
Daýys berýge jiberilgen jobalar budget.open-almaty.kz ınternet-portalynda jarıalanady.
«Halyq qatysatyn búdjet» týraly keńesti nemese aqparatty Almaty qalasy aýdandyq ákimdikterinen, sondaı-aq Open Almaty ákimdiginiń Qoǵamdyq qabyldaý bólmesinen 224 39 29 (ishki. 203) alýǵa bolady.