Qala aktıvi, belsendileri men soǵys ardagerleriniń gúl qoıý rásimi áskerı qyzmetkerlerdiń saltanatty marshymen bastalyp, Almaty qalasy ákiminiń estradalyq jáne sımfonıalyq orkestriniń merekelik konserti Qazaqstan estrada juldyzdarynyń atsalysýymen uıymdastyrylady. Bul týraly búgin Óńirlik komýnıkasıalar qyzmetinde ótken brıfıńte baıandaldy, dep habarlaıdy Almaty-akshamy.kz.
Almaty qalalyq ardagerler keńesi tóraǵasynyń orynbasary Serik Qurmanǵalıev megapolıstegi mamyr merekelerine daıyndyq qalaı júrip jatqany jóninde baıandap berdi.
«Jyldaǵy dástúr boıynsha, Almatyda Jeńis kúnin merekeleý tujyrymdamasyn ázirleýge ardagerler belsendi túrde qatysyp, qala ákimdigimen birlese otyryp, 41 tarmaqtan turatyn qalanyń is-sharalar josparyn jasaǵan. Birinshi kezekte soǵys ardagerleri men tyl eńbekkerlerine qurmet kórsetý - basty nazarda. Mereke kúni jergilikti bılik is-sharalar ótetin oryndardy merekelik bezendirip, qala boıynsha bılbordtar, medıataqtalar men LED ekrandar ornatady. Bıyl 50 myń dana «Jeńis» týraly taspa shyǵarylady. Olardy belsendi túrde taratý úshin volonterlar jappaı tartylady», - dedi ol.
Aýdan ákimderimen birge qalada ornalasqan memorıaldyq taqtalarǵa, eskertkishterge, soǵysta qaza tapqan, erlik kórsetken batyrlardyń máńgilik eskertkishterine (B.Momyshuly eskertkishi, T.Bıgeldınov, S.Nurmaǵambetov, R.Qoshqarbaev, Á.Moldaǵulova men M.Mámetova, S.Lýganskııdiń bústi, «Otan qorǵaýshy batyr uldaryna máńgilik eskertkish», «Otan úshin shaıqasta qaza tapqan batyrlarǵa máńgilik taǵzym» atty dańq eskertkishterine) taǵzym etiledi.
Taqyryptyq dızaındarmen bezendirilgen (brendmaýer, Ásker úıiniń qasbeti) kishi arhıtektýralyq pishinder, konsert sahnasy, ardagerlerge arnalǵan arnaıy shatyrlar, dalalyq asqana, UOS batyrlarynyń tiri «músinderi-qoıylymynyń» kórsetilimi jáne t.b. ornalastyryldy.
Sonymen qatar, zamanaýı qazaqstandyq áskerı tehnıka men qarý-jaraq kórmesi kórsetiledi.
Turǵyndarǵa beıbit ómirdegi merekelik kóńil-kúı syılaý úshin 9 mamyrda bir mezgilde birneshe jerde mádenı is-sharalar keńinen uıymdastyrylady.
Saǵat 10:00-den 14:30-ǵa deıin Voznesenskıı soborynyń aldyndaǵy alańda (28 gvardıalyq panfılovshylar saıabaǵy) konserttik baǵdarlama ótedi.
11:00-den 16:30-ǵa deıin Arbatta (Jibek joly men Panfılov kósheleriniń qıylysy) jáne Sh.Ýálıhanov atyndaǵy saıabaqta da osyndaı konsertter qala turǵyndary men qonaqtary úshin uıymdastyrylady.
Dál osy kúni basqa aýdandarda da (Alataý aýdanynda 7 mamyrda ótedi) qatar túrli merekelik sharalar ótkiziledi dep kútilýde.