Almaty qalasynyń ár aýdanynda turǵyndarǵa sapaly jáne qoljetimdi medısınalyq kómek kórsetý maqsatynda aýqymdy jumys júrgizilip jatyr.
Bul týraly Almaty qalasy ákiminiń orynbasary Beıbit Shahanov Óńirlik komýnıkasıalar qyzmetiniń baspasóz konferensıasynda málimdedi, - dep habarlaıdy Aqshamnews.kz.
Onyń aıtýynsha, almatylyqtardyń densaýlyǵyn qorǵaý – qala ákimdiginiń basty mindetteriniń biri. Osy baǵytta 2030 jylǵa deıin megapolıste 32 jańa jáne 14 eski medısınalyq nysandy jańǵyrtýdy qamtıtyn 46 densaýlyq saqtaý mekemesin damytý baǵdarlamasy júzege asyrylyp jatyr.
Barlyq jańa nysandar zamanaýı standarttarǵa saı salynyp, klınıkalyq-dıagnostıkalyq ortalyqtarmen jabdyqtalady. Bul medısınalyq qyzmetterdiń ár turǵynǵa qadamdyq qoljetimdi bolýyn qamtamasyz etedi.
Qazirdiń ózinde qalada 8 jańa medısınalyq nysannyń qurylysy júrip jatyr. Olardyń qatarynda:
- aýysymyna 500 adam qabyldaıtyn 2 emhana – Serkebaev kóshesinde jáne Quramys shaǵynaýdanynda;
- aýysymyna 400 adam qabyldaıtyn 2 dárigerlik ambýlatorıa – Saıaly shaǵynaýdanynda jáne Aıbasov kóshesinde;
- jylyna 50 myń shaqyrtýǵa eseptelgen jedel járdem qosalqy stansıasy (4-podstansıa).
Sonymen qatar, úsh nysanda seısmıkalyq kúsheıtý jáne qaıta jańartý jumystary júrip jatyr — №16 emhana men №4 jáne №7 qalalyq klınıkalyq aýrýhanalarda. Olardy bıylǵy jyldyń sońyna deıin aıaqtaý josparlanǵan.
Kelesi jyly taǵy 30 nysannyń qurylysy bastalady. Qazir olardyń jobalyq-smetalyq qujattamasy ázirlenip jatyr.
2026 jylǵa arnalǵan jospar:
I toqsanda – «Alataý» qalalyq emhanasyn qaıta jańartý, №2 perzenthana men Dýman shaǵynaýdanyndaǵy emhananyń qurylysy;
II toqsanda – 6 iri jobany bastaý, sonyń ishinde 300 tósekke arnalǵan kópbeıindi aýrýhana, Balalar jedel medısınalyq járdem ortalyǵy, №2 Balalar klınıkalyq aýrýhanasy, onkoortalyq jáne 200 tósekke arnalǵan perınataldyq ortalyq;
III toqsanda – qalǵan 20 nysannyń qurylysyn bastaý.
Baǵdarlama nátıjesinde Almatyda zamanaýı, yńǵaıly ári teńgerimdi aýrýhanalar men emhanalar júıesi qalyptasady. Bul óz kezeginde medısınalyq kómekti barlyq turǵyndarǵa qoljetimdi ári jaıly etedi.
«Bizdiń maqsat – ár turǵyn óz úıiniń janynda sapaly medısınalyq kómek ala alatyndaı jaǵdaı jasaý. Barlyq jobalar qolaılylyq pen zamanaýı qyzmet kórsetýge baǵyttalǵan», - dedi qala ákiminiń orynbasary Beıbit Shahanov.