Bul oqıǵa túngi ýaqytta bolǵan.
İri jol apatyn jasaǵan júrgizýshi oqıǵa ornynan jaıaý qashyp, jasyrynyp úlgerdi, dep habarlaıdy Almaty-akshamy.kz.
Almaty qalalyq polısıa departamentiniń málimetinshe, 5 qyrkúıek túngi saǵat 1:35-te Áýezov aýdanynda iri jol apaty boldy. «Mersedes» markaly avtokólik Saıyn kóshesimen soltústik baǵytta kele jatyp, «Nıssan», «Mersedes», «Toıota Lend Krýzer Prado», «Shevrole» kólikterimen soqtyǵysqan. Júrgizýshi oqıǵa ornynan jaıaý qashyp ketip, jasyrynyp úlgerdi.
«Qazirgi ýaqytta júrgizýshiniń kim ekeni anyqtaldy. Ony ustaýǵa tıisti sharalar qabyldanyp jatyr. Jol apatynan «Nıssan» avtokóliginiń júrgizýshisi men jolaýshysy zardap shekti. Atalǵan derek Áýezov aýdany polısıa basqarmasy qyzmetkerlerimen óndiriske qabyldandy», - dep habarlady qalalyq polısıa departamentiniń baspasóz qyzmetinen.