Almaty qalalyq mobıldilik basqarmasy qystan keıin paıda bolǵan shuńqyrlardy joıý boıynsha qandaı kóshelerde jumystar júrgizilip jatqanyn habarlady.
«Aqpan aıynyń ortasynda asfált-beton zaýyty merziminen buryn iske qosylyp, -5 gradýsqa deıingi temperatýrada asfált-beton qospasyn nyǵyzdaýǵa múmkindik beretin energıa únemdeıtin qospalary bar «jyly asfált» shyǵardy. Qazirgi tańda jol-kólik oqıǵasynyń aldyn alý maqsatynda 300-den astam «qalqymaly» lúk ornatyldy. Bul qurylym qudyqtardyń aınalasyndaǵy asfált jabynyn saqtaýǵa arnalǵan, óıtkeni qalqymaly korpýsy bar lúkter asfáltpen birge qozǵalady. Bul qudyqtardyń da, lúkterdiń de qyzmet etý merzimin aıtarlyqtaı uzartady», – dedi basqarma ókilderi.
Sonymen qatar, Rysqulov, Abylaı han, Raıymbek batyr, Tóle bı magıstraldyq kósheleriniń ýchaskelerinde aǵymdaǵy (shuńqyrly) jóndeý jumystary júrgizildi.
«Búgingi tańda jóndeý brıgadalary Gogol kóshesinde Nazarbaev dańǵylynan bastap Ortalyq mádenıet jáne demalys saıabaǵyna deıin jumys istep jatyr. Odan keıin Seıfýllın, Qonaev, Maqataev, Nazarbaev, Myńbaev jáne t.b. kóshelerde jumys bastalady», – dep atap ótti basqarmada.
Sondaı-aq, jaqyn arada aýdan ákimdikteri kóshe-jol jelisine aǵymdaǵy jóndeý jumystaryn bastaıdy. Ár aýdanda shamamen 30 myń sharshy metr jol jabyny jóndeledi. Jalpy, bıylǵy jaz mezgilinde Almatyda 300 shaqyrym joldyń ortasha jóndeý jumystary men 35 shaqyrym jańa jol qurylysy josparlanǵan.
Aıta keteıik, megapolıs turǵyndary @AlmatyJolybot chat-boty (https://t.me/AlmatyJolybot) jáne Almaty_Joly Telegram-arnasy arqyly joldaǵy shuńqyrdy jóndeý týraly ótinish bere alady.
Ótinish berý úshin:
* Mátindik habarlama,
* Aqaýdyń foto/beınematerıaly,
* Mekenjaıy men naqty koordınattary,
* Baılanys derekterin joldaý qajet.
Kelip túsken ótinishter qaralǵannan keıin ár jaǵdaı boıynsha tıisti sharalar qabyldanady. Shaǵymdar men usynystardy tıimdi qarastyrý úshin olardy tek resmı arnalar arqyly jiberý qajet. Áleýmettik jelilerdegi túrli pablıkterde qaldyrylǵan pikirler árkez qarastyryla bermeıdi.