Almatyda kene ensefalıti jáne Laım aýrýymen syrqattanǵandar sany artty. Bul týraly Densaýlyq saqtaý mınıstrliginiń Sanıtarıalyq-epıdemıologıalyq baqylaý komıtetinen málim etti, dep habarlaıdy Almaty-akshamy.kz Inform.kz-ke silteme jasap.
«Epıdemıalyq maýsymnyń basynan bastap, 13 qazanǵa deıin Almatynyń medısınalyq uıymdaryna kene shaqqan 3068 adam júgindi. Onyń ishinde balalar sany - 1513. 2021 jyldyń sáıkes kezeńimen salystyrǵanda turǵyndardyń kene shaǵýy 23,5% - ǵa artqan (2021 jyly - 2344 jaǵdaı/ balalar sany-1260). Keneniń shaǵýynan zardap shekken 3066 adamǵa seroprofılaktıka júrgizildi (99,9%)»,- delinedi vedomstvo habarlamasynda.
Bıylǵy jyldyń 9 aıynda 100 myń turǵynǵa shaqqandaǵy 0,33 kórsetkishpen kene ensefalıtiniń zerthanalyq rastalǵan 7 jaǵdaıy tirkeldi. 2021 jyldyń sáıkes kezeńinde kene ensefalıti tirkelgen joq. Sondaı-aq, myń turǵynǵa shaqqanda 0,42 aýrýshańdyq kórsetkishimen Laım aýrýynyń (kene borrelıozynyń) 9 jaǵdaıy tirkeldi. Bul kórsetkish 2021 jyldyń sáıkes kezeńimen salystyrǵanda 2,8 ese joǵary (3 jaǵdaı, kórsetkish-0,15) boldy.
«Kene ensefalıti jáne Laım aýrýymen (kene borrelıozymen) aýyrǵandar medısınalyq kómek alý úshin travmatologıalyq pýnktterge ýaqtyly júginbegen, tıisinshe kenege qarsy ımmýnoglobýlın almaǵan, sondaı-aq, profılaktıkalyq maqsatta buryn kene ensefalıtine qarsy ekpe almaǵan. Dıagnoz qoıylǵan soń barlyq naýqastar qaladaǵy stasıonarlarda em aldy, nátıjesinde saýyǵyp ketti»,- dep habarlady vedomstvoda.
Qala aýmaǵynda kene arqyly tasymaldanatyn aýrýlardyń spesıfıkalyq emes profılaktıkasy maqsatynda (2424,54 ga alańda) akarısıdtik óńdeý júrgizildi. Saıabaq jáne ormandy aımaqtar, adamdardyń demalatyn, jappaı jınalatyn oryndary óńdeldi.
Almaty qalasynyń sanıtarıalyq-epıdemıologıalyq baqylaý departamenti kene ensefalıtiniń aldyn alýdyń negizgi sharasy vaksınalaný ekenin eske saldy.
Vaksınalaný kýrsy 1-7 aı aralyǵynda eki ekpe alýdan turady. Kene ensefalıtine qarsy ekpeni jyl boıy alýǵa da bolady, degenmen, ekinshi ekpeden keıingi kelesi ekpeni 2 apta ótken soń alǵan durys. Eń qolaıly kezeń - birinshi jáne ekinshi vaksınalaný arasyndaǵy ınterval, ıaǵnı, 5-7 aı (birinshisi kúzde, ekinshisi kóktemde) bolyp tabylady. Vaksınalanýdy kúzde bastaý kerek, sebebi, epıdemıalyq maýsymnyń basynda adam aǵzasy ımýndyq qorǵanysty damytady jáne qaýipti ınfeksıaǵa qarsy tura alady.
Turaqty ımýnıtet úshin bir jyldan soń úshinshi ekpeni alý kerek. Keıin ımýnıtetti saqtaý úshin úsh jyl saıyn revaksınasıalaý júrgizý qajet. Qalada egýdi turǵylyqty jeri boıynsha (nemese tirkelgen jeri boıynsha) aýmaqtyq emhanalarda dárigerdiń keńesinen keıin tegin alýǵa bolady.
«Vaksına alǵan adamdar aýyrǵan jaǵdaıda olarda aýrý jeńil túrde ótedi jáne saldary az bolady. Ýaqtyly vaksınalaný sizdi jáne jaqyndaryńyzdy kene ensefalıti aýrýynan qorǵaıdy»,- delingen komıtet habarlamasynda.