Megapolıs ákimi Baqytjan Saǵyntaev elimizdiń eń iri qalasyndaǵy mektep tapshylyǵyn azaıtý máselesin sheshý týraly aıtty, dep habarlaıdy almaty-akshamy.kz
Almaty ákimi óziniń Instagram-daǵy akkaýntynda mektep qurylysyna erekshe kóńil bólinetinin, sebebi balalar sany jyl saıyn artyp kele jatqanyn basa aıtty. Megapolıste ómir súrý jaǵdaıynyń jaqsarýynan keıin demografıalyq kórsetkishter de ósýde. Birinshi synyptarǵa bıyl 30 myńnan astam bala bardy.
«Qalada mektep qurylysy qarqyn aldy. Alataý, Naýryzbaı men Túrksib aýdandarynda 12 600 oryndy 8 memlekettik mektep boı kóterýde. Sonyń ishinde úsh mektep jyl sońynda ashylady», - dep jazdy Baqytjan Saǵyntaev.
Syıymdylyǵy 8 myńnan asatyn jumys istep turǵan mektepke japsarlaı salynyp jatqan 17 korpýstyń 3-ýi oqý jylynyń basynda ashyldy. Jýyrda taǵy 6 ǵımarat paıdalanýǵa beriledi. Qalǵan 8-i bıyl qarasha aıynyń sońyna deıin bitedi.
Jańa mektepterdiń qurylysyna jeke ınvestorlar da belsendilik tanytýda. Jańa oqý jylynda qalada 11 mektep ashyldy. Birqatar joba júzege asyrylýda.
«Nátıjesinde 36 bilim berý nysanynyń ashylýy mekteptegi oryn tapshylyǵyn 23,3 myńnan astam oqýshyǵa azaıtpaq. Memleket basshysynyń tapsyrmasyna sáıkes, jumys jalǵasyn taýyp, mektep qurylysy jedeldetilmek», - dep atap ótti Almaty ákimi Baqytjan Saǵyntaev.
Habarlanǵandaı, jańa oqý jylynda qaladaǵy 287 mektep 300 myńǵa jýyq oqýshyǵa esigin aıqara ashty.