Almaty qalasynyń ákimdigi men «Almatybasjospar» ǴZI» JSHS 2040 jylǵa deıin Almaty qalasynyń jańa Bas josparyn qoǵamdyq talqylaýdy jalǵastyryp jatyr. Ekinshi kúni sarapshylar, qoǵam ókilderi men qalanyń barlyq aýdannyń ákimderi kólik ınfraqurylymyn, Almaty aglomerasıasyn jáne ınjenerlik jelilerdi damytýdy, sonymen qatar, Almatydaǵy aýanyń lastaný máselesin sheshý joldaryn talqyǵa saldy, - dep habarlaıdy almaty-akshamy.kz
Tranzıttik baǵytty damytý – qalanyń mańyzdy qala qurylysy qaǵıdasynyń biri bolyp tabylady. Jańa Bas josparda jaıaý júrginshiler ınfraqurylymyn odan ári keńeıtýge, Almatynyń barlyq aýdanynda turǵyndar úshin jańa serýendeý aımaqtaryn qurýǵa basa nazar aýdarylǵan.
Buǵan qosa, jańadan jolaqtar jasaý arqyly negizgi qoǵamdyq kólik dálizderin (BRT, LRT, metro) uıymdastyrý, sonymen birge velosıped joldary jelisin, velosıped pen elektrli samokatty jalǵa berý júıesin damytý josparǵa engen.
Almaty oblysynyń ortalyǵy Qonaev qalasyn damytý ýrbanızasıany jedeldetedi – boljam boıynsha 2030 jylǵa qaraı óńirde shamamen 4,5 mıllıon adam bolady. Basty mindettiń biri – ortalyq qala men aglomerasıany damytýdy úndestirý, birtutas kóliktik sheńberge baılanystyrý, seriktes qalalardy jáne aglomerasıanyń basqa eldi mekenderin polısentrlik damý qaǵıdasy boıynsha damytýdy qamtamasyz etý, turǵyndar úshin qajetti áleýmettik ınfraqurylym qurý jáne jańa joǵary ónimdi jumys oryndaryn uıymdastyrý. Bul aglomerasıa halqynyń ómir súrý sapasy men jaqsy turýyndaǵy aıyrmashylyqty qysqartýǵa tıis.
Ekologıalyq máseleler Bas jospardy ázirleýshilerdiń erekshe nazarynda. Aýaǵa zıandy zattar shyǵaryndylaryn azaıtý úshin qurylys jobalaryn jobalaý kezinde jeldený rejımin eskerip, JEO-2-ni gazǵa aýystyrý, ónerkásiptik kásiporyndar men jeke turǵyn úılerge gaz tartý josparǵa engen. Jańa 5 polıortalyqtyń bas josparlaryna tehnıkalyq sharttardy ázirleý kezinde aýa aǵyny qozǵalysyn eskerý qajet. Bul úshin qurylystyń qalanyń aýa baseınine áserin zertteý kezinde matematıkalyq modeldeýdi qoldaný, aerasıany jaqsartý úshin sáýlet-qala qurylysy ádisterin ázirleý usynylady.
Bas josparda joǵary sapaly ınjenerlik ınfraqurylym qarastyrylǵan. Ortalyqtandyrylǵan ınjenerlik jeli joq bos aýmaqtarda jyl saıyn 280 shaqyrym sý qubyry jelisin tartý jáne qaladaǵy qoldanystaǵy 104 shaqyrymdy jańartý josparlanyp otyr. Bul 2025 jyldyń sońyna qaraı almatylyqtardyń ortalyq sýmen qamtý deńgeıin 100 paıyzǵa deıin arttyrady.
Sýmen jabdyqtaý júıesin damytýmen qatar jańa sý burý júıelerin salýdy jáne qazirgi qoldanystaǵylaryn qaıta jóndeýdi jedeldetý josparlanyp otyr.
Qoǵamdyq talqylaýdyń ekinshi kúninde sarapshylar men qoǵam ókilderi tarapynan birqatar usynys pen eskertý aıtyldy. Erteń, 27 qańtarda qalanyń barlyq segiz aýdanynyń turǵyndarymen Bas jospardy talqylaý kózdelgen. Qujat tanystyrylǵan soń qala turǵyndary Almaty polıortalyqtarynyń bas josparyn ázirleý boıynsha mindetterdi belgileýge negiz bolatyn usynys pen eskertý aıtýǵa múmkindik aldy.
Aıta keteıik, 25 qańtar kúni Almaty qalasynyń ákimdigi men «Almatybasjospar» ǴZI» JSHS Almaty qalasynyń 2040 jylǵa deıingi jańa Bas josparyn qoǵamdyq talqylaýdy bastady. Qazirgi bas jospar 2002 jyly bekitilip, qalanyń ósip kele jatqan qajettilikteri eskerilmegen. Bas josparǵa engizilgen túzetýler ony jan-jaqty jetildire almady: qujatta ózgerister eskerilmedi, ózektiligin joǵaltty jáne túbegeıli qaıta qaraýdy qajet etti. Sondyqtan byltyr Almaty ákimi Erbolat Dosaevtyń tapsyrmasy boıynsha qalanyń 2040 jylǵa deıingi damýyn eskerilip, jańa bas jospardy jasaý qolǵa alyndy.