Almaty mýzeıleri 2023 jyly kirý bıletterin satýdan 60 mıllıon teńgeden astam tabys taýyp, aǵymdaǵy jylǵa arnalǵan jospardy 200% - ǵa asyra oryndady. Bul týraly mádenıet basqarmasynyń basshysy Ǵanı Maılybaev mýzeı isin damytý máseleleri jónindegi keńes barysynda málimdedi, dep habarlaıdy almaty-akshamy.kz
«Óner súıer qaýym úshin ótken jyly 73 kórme uıymdastyryldy, oǵan 125 230 adam qatysty – bul 2022 jylmen salystyrǵanda eki ese kóp. Kelý kezinde kirý bıletiniń baǵasy 250-den 5000 teńgege deıin ózgeretinin atap ótemiz. Balalar, zeınetkerler men stýdentter úshin jeńildikter qarastyrylǵan», - dedi ol.
Onyń aıtýynsha, bıyl murajaı isiniń ókilderi belsendi jáne jemisti jumys júrgizip, kóptegen ólshemder boıynsha úzdik nátıjeler kórsetti. Halyqaralyq uıymdarmen 15 memorandýmǵa qol qoıyldy, olardyń barlyǵy salany ilgeriletýge jáne damytýǵa baǵyttalǵan.
«Bizdiń kórmeler tek qala ishinde ǵana emes, Ońtústik Koreıada, Italıada jáne Avstrıada da uıymdastyryldy. Qala basshylyǵynyń qoldaýymen bıyl murajaı qyzmetkerleriniń jalaqysy 30% - ǵa kóterildi. Mýzeılerge kelýshiler sanynyń 2 esege artqany qýantady», - dedi Ǵanı Maılybaev.
Aıta keterligi, 2023 jyly Almaty mýzeı qyzmetkerleri 25 ǵylymı jáne ǵylymı-praktıkalyq konferensıalarǵa qatysyp, Fransıanyń jetekshi mzeılerinde kásibı biliktilikti arttyrý kýrstarynan ótti.
Eske salsaq, Almaty qalasy ákimdiginiń janynda 8 mýzeı jumys isteıdi, olar: Almaty mýzeıi, Yqylas atyndaǵy mýzykalyq halyq aspaptar mýzeıi, D. A. Qonaev mýzeıi, S.Muqanov pen Ǵ.Músirepovtyń ádebı-memorıaldyq mýzeı kesheni, N. Tilendıevtiń memorıaldyq mýzeıi, Dástúrli mýzykanyń mýltımedıalyq ortalyǵy, A. Baıtursynuly úı-mýzeıi, Raıymbek batyrdyń mýzeı kesheni.