23 qarasha, senbi kúni Almaty qalasynyń Alataý aýdanynda jeke turǵyn úılerde órt qaýipsizdigin qamtamasyz etý boıynsha «Órtsiz ómir - qaýipsiz bolashaq» aýqymdy profılaktıkalyq aksıasy ótti.
İs-shara Almaty qalasynyń Tótenshe jaǵdaılar departamentimen jáne Óńirlik komýnıkasıalar qyzmetimen birlesip ótkizildi. Aksıaǵa BAQ ókilderi, eriktiler jáne gaz qyzmetiniń qyzmetkerleri qatysty, dep habarlaıdy aqshamnews.kz.
İs-shara barysynda TJD mamandary 2297 úıdiń turǵyndaryn habardar etti. Kómir jáne otynmen jylytylatyn 16 muqtaj otbasylar úıinde gaz ıisin anyqtaý dachıkteri ornatyldy.
Almaty TJD basshysy Nurlan Atyǵaev jeke turǵyn úılerdegi qaýipsizdikti arttyrý boıynsha qabyldanyp jatqan sharalar týraly habarlady. Kóp balaly otbasylardy, zeınetkerler men múmkindigi shekteýli azamattardy qosa alǵanda, halyqtyń áleýmettik osal sanattaryna erekshe nazar aýdarylady.
«2018 jyldan bastap Almatyda az qamtylǵan otbasylar úshin óteýsiz negizde 1500-ge jýyq gaz ıisin anyqtaıtyn dachıgi ornatyldy. Alaıda, keıbir turǵyndar olardy óshirip tastaıdy, bul úlken qaýip tóndiredi. Biz túsindirý jumystaryn jalǵastyryp, barlyǵyn órt qaýipsizdigi erejelerin saqtaýǵa shaqyramyz», - dep atap ótti N. Atyǵaev.
Aýdan ákimdikteri ataýly kómek úshin halyqtyń áleýmettik osal toptaryna jatatyn 901 otbasyn anyqtady. Osy otbasylardyń barlyq 100% - y profılaktıkamen qamtylǵan, onyń ishinde 102 otbasy úılerin qatty otynmen jylytady.
Alataý aýdany ákimdiginiń málimetinshe, demeýshiler HÁOT úshin 200 dachık satyp alǵan. Dachıkterdi ornatý jumystary jalǵasýda.
«Qaýipsizdik úshin — Birge», «Qómek qoly» jáne «Taza tútin murjasy» aksıalary aıasynda 36 úıde ataýly órt-profılaktıkalyq kómek kórsetildi. Úılerde tútin murjalaryn tazalaý, jaryqshaqtardy biteý, tútin arnalary ótetin jerlerde qabyrǵalardy ákteý jáne irgeles aýmaqtardy tazalaý jumystary júrgizildi. Sondaı-aq, 41 úıde gaz ıisin anyqtaıtyn dachıkter ornatylǵan.
Sonymen qatar, muqtaj otbasylarǵa jylytý úshin otyn berý boıynsha is-sharalar uıymdastyryldy.
Kópshilikti qamtý úshin jumysqa eriktiler, gaz qyzmeti, aýdan ákimdiginiń qyzmetkerleri men qoǵam belsendileri jumyldyryldy. Turǵyndarǵa TJD-nyń 8 arnaıy mashınasynyń kómegimen qosymsha aqparat berildi, olar turǵyndardy jylytý maýsymynda órt qaýipsizdigi erejelerin saqtaý qajettigi týraly habardar etti.
Sondaı-aq, megapolıstiń iri saýda ortalyqtarynyń birinde TJD qoǵamdyq qabyldaýy jumys istedi, onda barlyq nıet bildirýshiler órt qaýipsizdigi salasynda ózderin qyzyqtyrǵan suraqtaryna jaýap ala aldy.