Almatyda eki jańa saıabaq aımaǵy paıda bolady. Bul týraly Almaty ákimi Erbolat Dosaev Jetisý aýdanynyń turǵyndarymen kezdesý barysynda málim etti, dep habarlaıdy aqshamnews.kz.
«2025 jyldyń maýsym aıynda Kemel shaǵyn aýdanynda 12 ga jaǵalaýdy abattandyrý jumystary bastalady, al aǵymdaǵy jyldyń qyrkúıek aıynda Aınabulaq shaǵyn aýdanynda 10 ga saıabaq aımaǵyn abattandyrý jobasy qolǵa alynady», - dedi Erbolat Dosaev.
Aıta keteıik, 2024 jyly Jetisý aýdanynda Esentaı ózeni boıynsha Kókmaısa, Kókjıek shaǵyn aýdandarynda jáne Kedrovaıa kóshesinde jalpy aýdany 24,6 ga 3 jańa saıabaq-jaǵalaý aımaǵy quryldy.
Sonymen qatar, Almaty ákimi «Halyq qatysatyn búdjet» baǵdarlamasyn iske asyrý boıynsha josparlaryn aıtty. Bıyl 30 joba júzege asyrylady. Bul - 22 qoǵamdyq keńistikti, 4 aýla aýmaǵyn jáne 4 basqa ınfraqurylym nysandaryn abattandyrý.
«Bıyl «Halyq qatysatyn búdjet» aıasynda 1200-den astam usynystyń ishinen 30 joba irikteldi. Osy baǵdarlama boıynsha bizdiń qalamyzda eń kóp ótinim Jetisý aýdanynyń turǵyndarynan túskenin erekshe atap ótkim keledi. Bul úshin shyn júrekten alǵys aıtamyn», - dedi ákim.
Megapolıs basshysy bıylǵy jyly aýdanda taǵy 1,9 mlrd teńgege qarjylandyrý ulǵaıtylǵanyn, onyń aıasynda Qulager sh/a 34 aýlaǵa aǵymdaǵy jóndeý júrgiziletinin atap ótti. Maqataev jáne Súıinbaı kósheleri boıynsha 3,9 km jaıaý júrginshiler aımaǵy abattandyryldy, 300 jaryqtandyrý tiregi qalpyna keltirildi, 6 myń sharshy metrden astam alańǵa gúlder otyrǵyzylady jáne 9 ǵımarattyń qasbetteri sáýlettik jaryqtandyryldy.
Úsh jyl ishinde Almatyda HQB baǵdarlamasy aıasynda 39,1 mlrd teńge somasyna 938 joba iske asyryldy. Erbolat Dosaevtyń tapsyrmasy boıynsha 2025 jyly osy maqsattarǵa 17,1 mlrd teńge bólindi.