Almatyda Qojanov jáne Esqaraev kósheleriniń boıynda 48 jyl buryn paıdalanýǵa engizilgen qubyrjol aýystyryldy
Almatyda Qojanov kóshesiniń boıymen Radostoves kóshesinen bastap E. Serkebaev dańǵylyna deıin jáne Esqaraev kóshesiniń boıymen Rozybakıev kóshesinen bastap E. Serkebaev dańǵylyna deıin tóselgen qubyrjoldy aýystyrý jumystary aıaqtaldy. Aǵymdaǵy jyly jańǵyrtylǵan ýchaskeniń uzaqtyǵy 1 097,5 metrdi qurady.
Aýystyrylǵan qubyrjol 1976 jyly paıdalanýǵa engizildi jáne qazirgi ýaqytta 19 kóppáterli turǵyn úılerdi, 2 balabaqshany jáne basqa da 39 obektini jylýmen jáne ystyq sýmen qamtamasyz etip otyr, sondaı-aq ystyq sý berýdiń úlestirilýin qamtamasyz etedi jáne «Orbıta» men «Iýjnyı» qazandyqtaryn bir-birimen baılanystyrady.
Jalpy, aǵymdaǵy jyly Almaty qalasynyń ákimi Erbolat Dosaevtyń tapsyrmasy boıynsha 20 km jylý jelileri jańǵyrtyldy. Jyl saıyn jańǵyrtý jylytýaralyq kezeń ishinde júrgiziledi, bıylǵy jyly mundaı jumystar Almatynyń 6 aýdanynda iske asyryldy. Jylýmen jabdyqtaý jelileri jańǵyrtylǵan ýchaskelerdi abattandyrý aýa-raıy jaǵdaılaryn eskere otyryp, kezeń-kezeńimen júrgizilýde.
Esterińizge sala keteıik, qozǵalystardy shekteýge qatysty barlyq aqparat Almaty.kz saıtynda, Telegram-arnada @AlmatyJoly, aýdandyq ákimder men basqarmalardyń áleýmettik jelilerinde, sondaı-aq «2GIS» jáne «Iandeks kartalar» servısterinde ornalastyrylǵan.