Óńirlik komýnıkasıalar qyzmeti alańynda Qazaqstan shahmat federasıasy ókilderi, Azıa shahmat federasıasynyń bas hatshysy Hısham Al-Taher jáne úndi shahmatshysy, shahmattan 2016 jylǵy Azıa chempıonatynyń jeńimpazy Panaıappan Setýrmannyń qatysýmen baspasóz konferensıasy ótti.
Buǵan deıin habarlanǵandaı, Balýan Sholaq atyndaǵy sport saraıynda ótken saltanatty sharany Almaty qalasy ákiminiń orynbasary Arman Qyryqbaev, Qazaqstan Shahmat federasıasynyń prezıdenti Tımýr Týrlov jáne Azıa shahmat federasıasynyń bas hatshysy Hısham Al-Taher ashty, dep habarlaıdy Almaty-akshamy.kz.
Tımýr Týrlov memleket basshysynyń qoldaýynyń arqasynda Qazaqstan 2023 jyly shahmattyń álemdik ortalyǵyna aınalǵanyn atap ótti.
«Halyqaralyq jarystardy ótkizý tájirıbesi bizdiń shahmat federasıasynyń jumysyn kúsheıtýge, elimizde shahmatty damytýǵa kóp jumys jasaýǵa kómektesedi, osylaısha bolashaqta budan da kóp chempıondar, myqty shahmatshylar shyǵady», - dedi ol.
RAI prezıdenti shahmattan qurlyqtyq Azıa chempıonatynda kórermenderdi qyzyqty ıntellektýaldy oıyndar kútip turǵanyn jáne týrnır qazaqstandyq balalardy osy tamasha oıyndy belsendi úırenýge shabyttandyratynyna senim bildirdi.
Óz kezeginde Hısham Al-Taher Qazaqstan Prezıdenti Qasym-Jomart Toqaevqa elde shahmat sportynyń damýyna kórsetken qoldaýy úshin, Almaty ákimi Erbolat Dosaev peg Tımýr Týrlovqa chempıonatty osyndaı joǵary deńgeıde uıymdastyrǵandary úshin alǵys bildirdi.
Ashylý saltanatynan keıin Birinshi týr ótti, onyń nátıjesi boıynsha Open-chempıonatta qazaqstandyq grosmeıster Rınat Jumabaev qarsylasyna eshqandaı múmkindik qaldyrmaı, senimdi jeńiske jetti. Óz juptarymen ótken oıynda Murtas Qajǵaleev, Denıs Mahnev, Nógerbek Qazbek jáne basqalary jeńiske jetti. Sheteldik oıynshylar arasynan erekshe tartysty oıyn partıalary Panaıappan Setrýman (Úndistan), Shamsýtdın Vahıdov (Ózbekstan) jáne ırandyq Daneshvar Bardıa arasynda boldy.
Áıelder chempıonatynyń Birinshi kezeńiniń qorytyndysy boıynsha Qazaqstan shahmatshylary – Arnash Baýyrjan, Lıa Qurmanǵadıeva, Ámıná Qaıyrbekova jeńis tuǵyrynan kórindi.
Eske salaıyq, shahmattan erler arasyndaǵy ashyq birinshilik pen áıelder arasyndaǵy chempıonatty qamtıtyn qurlyqtyq Azıa chempıonaty Shveısarıa júıesi boıynsha, FIDE erejesine sáıkes 9 týrdan turady. Oǵan Azıanyń 18 elinen 128 myqty oıynshy qatysýda. Jarys 2023 jyldyń 12 maýsymyna deıin jalǵasady. Sharanyń júlde qory 100 000 AQSH dollaryn quraıdy.
Ashyq chempıonattyń tórt jeńimpazy jáne áıelder chempıonatynyń eki jeńimpazy bıylǵy jyldyń 29 shildesi men 25 tamyzy aralyǵynda Bakýde ótetin FIDE–2023 álem chempıonatyna qatysý quqyǵyna ıe bolady. Álem kýbogynyń jeńimpazdary shahmat álemindegi eń joǵary ataq – shahmattan álem chempıony ataǵy úshin talasady.
Shahmattan Azıa qurlyqtyq chempıonatyn uıymdastyrýshylar – Qazaqstan Respýblıkasy Mádenıet jáne sport mınıstrligi, Azıa shahmat federasıasy, Almaty qalasy ákimdiginiń qoldaýymen Qazaqstan shahmat federasıasy. Týrnırdiń bas seriktesi – Freedom Holding Corp.