Almatyda 11-synypty aıaqtaǵan 18 myń túlekke arnalǵan biryńǵaı saltanatty «Mektebim, saǵan myń alǵys» atty is-shara ótti, dep habarlaıdy aqshamnews.kz Almaty qalasy Bilim basqarmasyna silteme jasap.
Bilim basqarmasynyń basshysy Saıran Saıfedenov ustazdarǵa eńbekterine adaldyǵy úshin alǵys bildirip, túlekterge jańa ómir jolynda sáttilik pen tabys tiledi.
Almaty mektepteriniń túlekteri ulttyq jáne halyqaralyq deńgeıde joǵary jetistikter kórsetti. Qalalyq komanda respýblıkalyq olımpıadada jaratylystaný-matematıkalyq jáne qoǵamdyq-gýmanıtarlyq baǵyttar boıynsha birinshi oryndy ıelenip, 66 medal men Gran-prı jeńip aldy.
Almatynyń ustazdary da erekshe kózge tústi. Bıyl mektepterge myńnan astam jas maman kelip, muǵalimderdiń jalpy sany 27 myńnan asty. «Almaty ustazy» qalalyq baıqaýynyń jeńimpazdary halyqaralyq taǵylymdamadan ótti, al Gran-prı ıegeri qala ákimi atynan 5 mıllıon teńge kóleminde grantqa ıe boldy. Sonymen qatar, almatylyq pedagogter oqyrmandyq jáne matematıkalyq saýattylyq boıynsha respýblıkalyq baıqaýda júldeli oryndarǵa ıe boldy.
Jalpy, 2024–2025 oqý jylynda Almaty qalasynda 349 465 oqýshy bilim aldy. Sonyń ishinde 18 myńnan astamy – 11-synyp oqýshylary. Aıta ketý kerek, 1 764 túlek mektepti úzdik bitirdi, 670 oqýshy «Altyn belgige» úmitker. Ulttyq biryńǵaı testileýge 11-synyp oqýshylarynyń 92,1 paıyzy – ıaǵnı 17 522 adam – qatysatynyn rastady.