9 aıdyń qorytyndysy boıynsha Almaty onkologıalyq ortalyǵy 16409 naýqasqa mamandandyrylǵan onkologıalyq kómek kórsetti, dep habarlady AOO dırektory Nursultan Izbagambetov.
Arnaıy ınfýzomat pen yńǵaıly kreslo ornatylǵan AOO kúndizgi stasıonarynda jyl basynan beri 10 263 naýqas hımıoterapıa kýrsynan ótken.
800-ge jýyq pasıent sáýlelik em aldy, olar joǵary energıalyq jelilik údetkishte joǵary tehnologıalyq sáýlelik terapıanyń 13 myńnan astam seansynan ótti.
2 myńnan astam operasıa jasaldy. Almaty onkologıalyq ortalyǵynda qazirgi tańda laparoskopıa kómegimen ońaltý ýaqytyn qysqartyp, operasıadan keıin asqynýdy boldyrmaıtyn biregeı zamanaýı operasıalar jasalady.
«Bizde úlken hırýrgıa bólimshesi bar, onda gınekologıalyq, mammologıalyq, keýde qýysyna, abdomınaldi jáne nesep-jynys múshelerine túrli operasıa jasalady. Bárine joǵary tehnologıalyq kómek kórsetiledi. Buryn mundaı shaǵyn ınvazıvti tehnologıalyq kómek alý úshin shetelge barý kerek bolatyn. Otalardyń jartysy shaǵyn ınvazıvti ádispen jasalady. Ortalyqtyń qural-jabdyǵy jetkilikti, qajetti materıaldar tolyq kólemde bar. Shetelge baryp ota jasatýdyń qajeti joq», - deıdi Almaty onkologıalyq ortalyǵy hırýrgıalyq qyzmetiniń basshysy Nurlan Baltaev.
Qazirgi kezde Almatyda 31196 onkologıalyq naýqas tirkelgen.
Almatyda qaterli isikti erte kezeńde anyqtaý úrdisi artyp kele jatqany qýantpaı qoımaıdy. Buǵan qala emhanalarynda júrgizilgen skrınıngtiń arqasynda qol jetkizildi.
Onkologtar skrınıngtik tekserýden ótýdiń mańyzdylyǵyn eske salady. Skrınıng aýrýdy erte kezeńde anyqtaýǵa kómektesedi ári aman qalý múmkindigi joǵary bolady - 90%.
«Elimizde skrınıngter tegin júrgiziledi, profılaktıkalyq tekserýge ýaqtyly barý kerek. Ókinishke qaraı, turǵyndar kóbine skrınıngke mán bermeı, eleı qoımaıdy. Qaterli isik neǵurlym erte anyqtalsa, saýyǵyp ketý yqtımaldyǵy soǵurlym joǵary bolady», - dep túsindiredi N.Izbagambetov.