Qarjylyq monıtorıń agenttiginiń Almaty qalasy boıynsha departamenti uıymdasqan qylmystyq toptyń bes múshesine qatysty sotqa deıingi tergeýdi aıaqtady, dep habarlaıdy Almaty-akshamy.kz.
Top músheleri 2018-2020 jyldar aralyǵynda óz baqylaýyndaǵy 25 kompanıa arqyly 135 mlrd teńgege jýyq somaǵa jalǵan shot-faktýra jazǵan.
Osylaısha kontragent-satyp alýshylar búdjetke tólenbegen salyq túrinde memleketke 39 mlrd teńgege jýyq shyǵyn keltirgen.
Sondaı-aq, tergeý barysynda kontragent-satyp alýshylardyń baqylaýdaǵy kompanıalardyń bank shotyna túsken qarajaty shetel kompanıalarymen jalǵan shart jasasý arqyly respýblıkadan tys jerlerge shyǵarylǵany, onda shetel valútasyndaǵy qaıtarylmaǵan qarajattyń somasy 6,6 mln AQSH dollaryn quraǵany anyqtaldy.
Sot úkimimen bes aıyptalýshynyń bári kináli dep tanylyp, olarǵa 5 jyldan 7 jylǵa deıin bas bostandyǵynan aıyrý jazasy taǵaıyndaldy.
Tárkilengen 65 myń AQSH dollary men 20 mln teńgeden astam qarjy memleket kirisine alyndy.