Almaty zoobaǵynda kópten kútken qýanyshty oqıǵa boldy – 6 jastaǵy Bentlı men 5 jastaǵy Aıkı esimdi amýr jolbarystarynyń jubynan eki erkek jolbarys kúshigi dúnıege keldi. Bul – sońǵy jyldardaǵy alǵashqy tól jáne Qyzyl kitapqa engen sırek túrdi saqtaýǵa qosylǵan mańyzdy úles. Bul týraly Almaty qalasynyń Mádenıet basqarmasy habarlady.
Amýr jolbarysy joıylyp ketý qaýpi bar túrge jatady. Sondyqtan mundaı janýarlardyń zoobaq jaǵdaıynda kóbeıýi genetıkalyq alýandyqty saqtaýda jáne popýlásıany qorǵaýda asa mańyzdy ról atqarady.
Jolbarystar jubyn qalyptastyrý ońaı emes: tabıǵatynan olar – jalǵyz júretin jyrtqyshtar. Zoobaq mamandary jolbarys serigin muqıat tańdap, volerdi daıyndap, janýarlar ózderin qaýipsiz sezinetin jaǵdaı jasady. Sonyń arqasynda saý tól alýǵa múmkindik týdy.
Jolbarys kúshikteri 14 maýsymda dúnıege kelip, alǵashqy aılaryn arnaıy tynysh aımaqta ótkizdi. Bul – shý men syrtqy dybys pen kózge túsetin áserlerdi azaıtatyn arnaıy voler. Mundaı jaǵdaı analyq jolbarystyń kúızelisin tómendetip, tóldiń durys damýyna qajet.
«Amýr jolbarystarynyń analyqtary óte myqty analyq túısigi bar jáne oqshaýlanýdy qajet etedi. Alǵashqy aılarda tólin qorǵaý úshin kez kelgen syrtqy dybys pen kózge túsetin áserlerge asa sezimtal bolady. Sondyqtan biz oǵan akýstıkalyq jáne vızýaldyq áseri tómen orta jasadyq. Úsh aıǵa deıin jolbarys kúshikteri «sezimtal kezeńnen» ótti. Bul ýaqytta artyq dybys pen ıis analyqtyń mazasyzdanýyna, sonyń saldarynan tóldiń damýyna áser etýi múmkin. Osy ýaqyt boıy otbasy kúndelikti veterınarlyq baqylaýda boldy. Qazir karantın aıaqtaldy, kúshikterdiń jaǵdaıy jaqsy, naǵyz jolbarysqa tán qylyqtaryn kórsete bastady», – dedi zoobaqtyń bas veterınarlyq dárigeri Vıtalıı Sachkov.
Aldaǵy demalys kúnderi anasymen birge jolbarys kúshikteri jańa volerge kóshiriledi. Onda kelýshiler Almaty zoobaǵynyń jańa turǵyndarymen tanysa alady.