Almaty ákimi Darhan Satybaldy jumys sapary aıasynda qalanyń jol, ınjenerlik jáne áleýmettik ınfraqurylymynyń damý barysymen tanysty.
Qalalyq mobıldilik basqarmasynyń basshysy Saǵyndyq Telibaev shahar ákimine Rysqulov dańǵyly men Jubanov kóshesindegi qurylystyń barysy týraly esep berdi. Máselen, Rysqulov dańǵylyn Ońǵarsynova kóshesinen qala shekarasyna deıin uzartý jobasy trotýarlar men velojoldar bar alty jolaqty joldy qamtıdy. Onyń jalpy uzyndyǵy 2,3 shaqyrym. Nysannyń qurylysyna bólingen shekaralarǵa 220 jer ýchaskesi kiredi, onyń 183-i satyp alynǵan. Jubanov kóshesin Momyshuly kóshesinen qala shekarasyna deıin uzartý jumystary da jer ýchaskelerin satyp alýǵa baılanysty júrgizilýde. Joldyń jalpy uzyndyǵy 3,9 shaqyrym. Búginde 365 jer ýchaskesiniń 120-sy satyp alyndy.
«Magıstraldyq jáne radıaldy kóshelerdi uzartý aıasynda jer ýchaskelerin satyp alý boıynsha jumystardy jedeldetý qajet, óıtkeni jumystardy oryndaý kestesi aýmaqtardy ýaqytyly bosatýǵa baılanysty. Bul qala úshin mańyzdy jobalar. Sonyń arqasynda aýdandar arasyndaǵy baılanys jaqsarady jáne kólik júktemesi azaıady», - dep atap ótti Darhan Satybaldy.
Jumys sapary barysynda Almaty ákimi Shuǵyla shaǵynaýdanynyń turǵyndarymen kezdesti. Olar elektr jelileriniń jeke menshikte bolýy saldarynan birqatar kóshelerde jaryq jıi sónip qalatynyn aıtty.
Energetıka jáne sýmen jabdyqtaý basqarmasy qala ákimine atalǵan shaǵyn aýdanda 11,2 shaqyrym kabeldik jeli salynyp, eki transformatorlyq qosalqy stansıa ornatylǵanyn baıandady. Búginde transformatorlardy iske qosý jáne elektr energıasyn esepteý quraldaryn ornatý jumystary júrgizilýde. Bıyl qarasha aıynda jumysty tolyq aıaqtaý josparlanyp otyr.
Sonymen qatar, qala ákimi Naýryzbaı aýdanyndaǵy № 174 mektep-gımnazıa janyna salynǵan qosalqy nysandy da aralap kórdi. Úsh qabatty 350 bastaýysh synyp oqýshylaryna arnalǵan ǵımarat ınteraktıvti kabınettermen, barlyq qajetti qurylǵylarmen jabdyqtalǵan. Nysan osy jyldyń qazan aıynda tolyq aıaqtalady.