Qala kúnine oraı Almaty zoobaǵy kópbalaly jáne áleýmettik jaǵdaıy tómen otbasylarǵa, erekshe qajettiligi bar balalardyń otbasylaryna, sondaı-aq mektep-ınternattar men ońaltý ortalyqtarynyń tárbıelenýshilerine tegin ekskýrsıa uıymdastyrdy. Sońǵy birneshe kúnniń ishinde myńnan astam oqýshy ekskýrsıaǵa qatysyp, janýarlar álemi jaıly tyń málimet aldy.
Ásirese, dástúrli sholý baǵyttary kópshilikti qyzyqtyrǵan. Munda kelýshiler barlyq janýarmen tanysady. Sonymen qatar «Qyzyl kitap betterinen», «Neptýnnyń sý asty álemi» sekildi arnaıy taqyryptyq ekskýrsıalar da usynylady.
«Bizdiń tapsyrys kestemiz aıdyń sońyna deıin tolyp tur. Aýa raıy qolaıly bolyp, mereke kúnderi múmkindiginshe kóp adamdy qýanta alamyz dep senemiz», – dedi damý jáne qoǵammen baılanys bóliminiń basshysy Aqjámı Rahımova.
Aıta keteıik, zoobaqqa 6 jasqa deıingi balalar, erekshe qajettiligi bar adamdar, jasy boıynsha zeınetkerler, merzimdi áskerı qyzmetshiler jáne 15 jasqa deıingi balalary bar kópbalaly analar tegin kire alady. Ol úshin tıisti qujatty kórsetip, kasadan «nóldik» bılet alý jetkilikti.