Búgin elimizde sheteldik kólikterdi tirkeý naýqany bastaldy. Sheteldik kólikti zańdastyrý naýqany aıasyndaǵy alǵashqy kólik Almatyda tirkeldi.
Búgin Almaty turǵyny, 39 jastaǵy Seıilbek Oljabekov Almatyǵa 2019 jyly Armenıadan ákelingen kóligin tirkedi, dep habarlaıdy Almaty-akshamy.kz Polisia.kz-ke silteme jasap.
«Men – kóp balaly ákemin, osy kóliktiń arqasynda kún kóremin, jeke jolaýshylar tasymalymen aınalysamyn. Memleket bergen osyndaı biregeı múmkindikti paıdalandym. Bul, shynymen de, halyqty qoldaý. Biz óte rızamyz. Aqyry kóligimdi zańdastyryp aldym», – deıdi, Seıilbek Oljabekov.
Eske salaıyq, búgin, ıaǵnı, 23 qańtarda, Qazaqstanda sheteldik kólikterdi zańdastyrý naýqany bastaldy. Kez kelgen kólik ıesi bul naýqandy paıdalana alady jáne zańdastyrýǵa ótinish bere alady.