2024 jyldyń aıaqtalýyna da sanaýly kúnder qaldy. Ádettegideı, osy kezeńde almatylyqtar ótken jyldyń mańyzdy oqıǵalaryna kóz júgirtip, este qalǵan sátterdi eske alady. 2024 jyl Almaty úshin erekshe tabysty boldy. Qalanyń ınfraqurylymy men áleýmettik salasynda birneshe mańyzdy ózgerister oryn alyp, megapolıs turǵyndary jańa múmkindikter men jetistikterdi atap ótýde. Tómende Almatynyń bıylǵy negizgi jetistikterin saralap bergen shahar turǵyndarynyń pikirlerin jarıalap otyrmyz.
Áýejaı termınaly
Týrızm salasynyń mamany Aıymbıbi Nurmasheva Almaty halyqaralyq áýejaıynyń jańa termınalynyń ashylýyn erekshe atap ótti. Bul joba qalanyń halyqaralyq bedelin arttyryp, týrıser aǵynyn kóbeıtýge múmkindik beredi. Zamanaýı talaptarǵa saı salynǵan ǵımarat keńdigimen, ınklúzıvti qyzmetterimen jáne joǵary sapaly ınfraqurylymymen erekshelenedi. Bul – eldiń damyǵan jáne ınovasıalyq bolashaǵyn kórsetetin taǵy bir mańyzdy qadam.
Jastarǵa qoldaý
Almatynyń stýdentteri úshin 2024 jyl jaǵymdy jańalyqtarmen este qaldy. Júrgenov akademıasynyń 2-kýrs stýdenti Aıym Dáýrenqyzy jastardy jataqhanalarmen – stýdentter úılerinde bólmelermen qamtamasyz etý, stıpendıanyń ósýi jastarǵa aıtarlyqtaı qoldaý bolatynyn atap ótti. Bul ózgeris stýdentterdi bilim alýǵa yntalandyryp, jaqsy nátıjelerge jetýge ıtermeleıdi. Jastardy qoldaý – bolashaqqa salynǵan eń úlken ınvestısıa.
SON qyzmeti jáne
"Halyq qatysatyn búdjet" jobasy
Zeınetker Dáýlet Óserhanuly memlekettik qyzmet kórsetýdiń jeńildegenin aıtyp, alǵys bildirdi. Buryn qujattardy jınaý men rásimdeý kúrdeli jáne uzaq ýaqytty qajet etse, búginde bul proses «bir tereze» qaǵıdasy boıynsha tez ári sapaly júzege asyrylady. Zeınetkerlerdiń júıke júıesin saqtaı otyryp, qyzmet kórsetý mádenıetiniń artqany – áleýmettik reformalardyń nátıjesi. Sondaı-aq, zeınetker Almaty qalasy ákimdiginiń "Halyq qatysatyn búdjet" jobasynyń turǵyndardyń jaıly turmysy úshin, shahardyń kórki men tazalyǵy úshin mańyzyn erekshe atap ótti.
Bilim salasyndaǵy serpilis
Jas maman Beıbit Muratuly Almatyda jańa mektepterdiń ashylýyn asyǵa kútýde. Bul bastama mektepterdegi oryn tapshylyǵyn joıýǵa, sapaly bilim berýdi qamtamasyz etýge jáne pedagogtarǵa qosymsha jumys oryndaryn usynýǵa yqpal etedi. Sonymen qatar, jańa bilim berý oryndarynyń zamanaýı jabdyqtarmen qamtamasyz etiletini sapaly oqytý prosesiniń negizgi faktoryna aınalmaq.
Kóktóbeniń jańa kelbeti
Qala turǵyndary Kók-Tóbe telemunarasynyń erekshe jaryqtandyrylǵanyn maqtanyshpen atap ótti. Kásipker Ermurat Qajymurat telemunaranyń qalaǵa zamanaýı ári ınovasıalyq reńk bergenin jetkizdi. Bul tek arhıtektýralyq sheshim ǵana emes, sonymen qatar megapolıstiń jańa sımvolyna aınaldy. Áleýmettik jelilerde bul kórikti orynnyń fotosýretteri úlken qyzyǵýshylyq týdyrýda.
"Uzaq ómir súrý ortalyǵy" jobasy
jáne tegin Wi-Fi
Zeınetker Saltanat Rysbekqyzy Almaty metrosyndaǵy tegin Wi-Fi jelisiniń qala turǵyndary men qonaqtaryna úlken jeńildik ákelgenin aıtty. Endi kez kelgen jolaýshy metro stansıasynda ınternetke qosylyp, qajetti aqparatty ońaı taba alady. Bul qadam megapolıstiń sıfrlandyrý salasyndaǵy jetistigin kórsetedi. Zeınetker sondaı-aq qala ákimdigi uıymdastyrǵan tegin Uzaq ómir súrý ortalyqtarynyń zeınetkerler úshin mańyzy men óte tıimdiligin atap ótip, qala basshylarynyń utymdy jobasyna rızashylyǵyn bildirdi.
2024 jyl Almaty úshin jańa belesterdi baǵyndyrǵan tabysty jyl boldy. Áýejaı termınalynan bastap jańa mektepter men qoǵamdyq kólik qyzmetine deıingi ózgerister qala turǵyndarynyń ómir sapasyn arttyryp, bolashaqqa senim uıalatady. Bul jetistikter – qalanyń damý qarqynyn jáne turǵyndardyń megapolıske degen maqtanyshyn dáleldeıdi. Almaty aldaǵy jyldarda da ósip-órkendeı beretini sózsiz.