Almaty Tourism Bureau Almatynyń týrısik áleýetin shetelde keńinen tanystyrý jumystaryn jalǵastyryp jatyr. Osy baǵytta jetekshi halyqaralyq áýe kompanıalarymen strategıalyq kelisimder jasalyp, «Visit Almaty» brendi sıfrlyq arnalar, áleýmettik jeliler men mýltımedıalyq platformalar arqyly ilgeriletilmek.
Alǵashqy seriktesterdiń biri – Air Astana. Áýe kompanıasynyń resmı saıtynda Almaty týraly aǵylshyn jáne koreı tilderinde jeke bet ashylyp, onda Visit Almaty logotıpi men týrısik baǵyttar usynyldy. Qyrkúıekten bastap borttaǵy ekrandarda qala týraly beınerolıkter kún saıyn kórsetiledi. Buǵan qosa, Tengri jýrnalyna Almatynyń týrısik múmkindikteri týraly maqala jarıalandy, al kompanıanyń Instagram paraqshasynda arnaıy jazba daıyndalyp jatyr.
Erekshe nazar Ońtústik-SHyǵys Azıa naryǵyna aýdaryldy. Kýala-Lýmpýr men Sıngapýrda AirAsia kompanıasymen birlesip Visit Almaty logotıpi bar bılbordtar ornatyldy. Bul mıllıondaǵan tranzıttik jolaýshylardyń, ásirese jastar men jeke saıahatshylardyń nazaryn aýdarýǵa múmkindik beredi.
Jaqyn ýaqytta basty seriktesterdiń biri – Qatar Airways bolmaq. Áýe kompanıasy Almatyny ilgeriletýge 370 myń AQSH dollaryn ınvestısıalaıdy. Kompanıanyń resmı saıtynda qala týraly aǵylshyn jáne arab tilderinde aqparattyq better ashylyp, naýqan Katar, BAÁ jáne Saýd Arabıasy naryǵyn qamtıdy. Bul Almatynyń mádenıet pen tabıǵatty baǵalaıtyn saıahatshylar úshin jańa týrısik baǵyt retindegi mártebesin arttyrady.
Turkish Airlines-pen áriptestik Instagram jelisindegi Reels jáne Stories formatyndaǵy avtorlyq kontent arqyly Almatyny álemdik aýdıtorıaǵa tanytýǵa múmkindik beredi.
Sonymen qatar NEOS Air kompanıasymen 450 myńnan astam jazylýshysy bar bazaǵa email-naýqan júrgizý jáne áleýmettik jelilerde birqatar jarıalanymdar shyǵarý josparlanǵan.
Barlyq seriktestik jobalar osy kúzden bastap júzege asady. Áýe kompanıalarynyń sıfrlyq resýrstaryn paıdalaný «Visit Almaty» brendiniń tanymaldyǵyn arttyryp, Almatynyń halyqaralyq ımıjin nyǵaıtyp, qalaǵa keletin týrıser sanyn kóbeıtýge yqpal etedi.