Jazylýshylar sany mıllıonǵa jetti.
«Almaty» telearnasy YouTube jelisiniń «Altyn batyrmasyn» aldy. Onyń YouTube arnasy 2010 jyly ashylyp, júıeli túrde jumys istep keledi. 2018 jyly telearna YouTube-tiń «Kúmis batyrmasyn» alǵan bolatyn. Mine, araǵa 4 jyl salyp, «Altyn batyrmaǵa» da qol jetkizip otyr. Álemdik vıdeohostıngtiń «Altyn batyrmasy» paraqshaǵa 1 mln oqyrman jazylǵanda beriledi, dep habarlaıdy Almaty-akshamy.kz Almaty.tv arnasyna silteme jasap.
«Qurmetti dostar, bul «Kúmis batyrma» jaqyn arada «altynǵa» aınalady, óıtkeni keshe ǵana «Almaty» telearnasynyń YouTube áleýmettik jelisinde jazylýshylar sany mıllıonǵa jetti. Demek, AQSH-tan Almatyǵa arnaıy keletin «Altyn» túımeni ıelendi. Men ony telearna basshylyǵyna qýana tabystaımyn. Bul mıllıon jazylýshy ǵana emes, saıtta jarıalanǵan 60 000 materıal 300 mıllıonnan astam qaralym jınady degen sóz. «Almaty» telearnasynyń YouTube jelisine áli jazylmaǵan bolsańyz, tezirek jazylyńyz», – dedi YouTube-tiń Qazaqstandaǵy ókili Samson Bezmátejnyı.
Telearna ónimderin álemniń 100-den astam elinde beınehostıngten tamashalaı alady. Negizgi aýdıtorıa – qazaq halqy, odan keıin orystar, qyrǵyz, ózbek aǵaıyndar.
«Bizdiń arna 4 jylda osy jetistikke jetti. Biz 100 000 jazylýshymen bastadyq, búgin kópten kútken óte mańyzdy oqıǵa boldy. Endi mıllıon kórermenimiz bar. Bul ujymnyń eńbegi dep esepteımin, óıtkeni telearnadaǵy ár qyzmetkerdiń shyǵarmashylyq jetistiginiń arqasynda osyndaı nátıjege qol jetkizdik», – dedi «Almaty» telearnasynyń bas prodúseri Ralıda Muqanova.
4 tamyzdan bastap «Almaty» telearnasy respýblıkalyq mártebe alyp, Qazaqstan Respýblıkasynyń búkil aýmaǵynda habar taratýǵa mindetti arnalar tizimine engenin atap ótken jón. Sondaı-aq Aqparat jáne áleýmettik damý mınıstrliginiń aqparattyq agenttik jáne ınternet-basylym retinde tirkelgeni týraly kýáligin aldy.
2022 jyldyń jańa maýsymyna «Almaty» telearnasy 8 áleýmettik-dramalyq jáne tarıhı serıal, sondaı-aq 26 baǵdarlama, onyń ishinde 11 jańa telejoba daıyndady. Baǵdarlamalar YouTube áleýmettik jelisi arqyly da kórermenge kórsetilip keledi.
2022 jyly arnaǵa rebrendıng jasaldy. Brendtiń jańarýy «Almaty» telearnasy damýynyń jańa kezeńge aıaq basqanyn jáne kontent sapasy artyp, dástúrli efır men sıfrlyq ınternet sınergıasyna bet alǵanyn kórsetedi. «Almaty» telearnasy eresekter aýdıtorıasyn da, áleýmettik jeliler men onlaın resýrstardy keńinen qoldanatyn jas kórermenderdi de keńinen qamtıtyn «zamanaýı klasıkaǵa» barynsha kóńil bólmek.
Marketıńtik maqsatta restaılıngti, jańa aıdentıkany jáne efırlik bezendirýdi, jańartylǵan habar taratý kestesin jáne t.b. qamtıtyn sharalar qabyldandy. Alǵash ret telejobalardy efırde jáne efırden tys damytý maqsatynda telearnanyń birtutas ımıjdik strategıasy qabyldandy.
«Búginnen bastap bizdiń YouTube arnamyzda jańa beles bastalady dep oılaımyn, ol bizge kúsh-qýat beredi, shyǵarmashylyq serpinpen jańa belesterge jetýge múmkindik beredi. «Qandaı soldat general bolýdy armandamaıdy» degendeı, 10 mıllıon jazylýshyǵa jetkenshe talmaı eńbek etemiz. «Almaty» telearnasynyń damýynyń basty baǵyttarynyń biri sıfrlyq ortada ózindik kontent qurý jáne nasıhattaý ekenin eskere otyryp, jaqyn arada «Men reportermin», «Jelide», «SuperMen» «Kúnderek», «#REC» ınteraktıvti jobasy áleýmettik jelilerde iske qosylady», - dedi «Almaty» telearnasynyń bas prodúseri Ralıda Muqanova.
2022 jyldyń qyrkúıeginde Youtube qoldanýshylary «Almaty» telearnasynyń kontentin qaraýǵa 934 000 saǵat ýaqyt jumsaǵan, basqasha aıtqanda, bul kórsetkish 106 jylǵa teń.
«Alatay Aqparat» medıaholdınginiń ujymy áriptesterin joǵary jetistikterimen quttyqtaıdy.