Almatyda «Pıoner» taý shańǵysy otbasylyq kýrortynyń mańynda qar kóshkini boldy, zardap shekkender joq, dep habarlaıdy Almaty-akshamy.kz
Almaty qalalyq tótenshe jaǵdaılar departamentiniń málimetinshe,17 naýryz kúni tańerteń, qatty jaýyn-shashynǵa baılanysty Qotyrbulaq ózeni alqabynyń joǵarǵy aǵysynda jalpy kólemi 30 myń tekshe metr qamtyǵan ózdiginen qar kóshkini tústi.
Qar kóshkini «Pıoner» taý shańǵysy otbasylyq kýrortynyń ǵımaratyna deıin jetti.
Oqıǵa ornyna "Qazseldenqorǵaý" MM Almaty paıdalaný-tehnıkalyq basqarmasynyń basshysy Samat Daýlenqanov bardy.
Onyń aıtýynsha, eshkim zardap shekken joq.
«Aıta ketý kerek, buǵan deıin 15 naýryzda «Qazseldenqorǵaý» MM AGETÝ fılıaly «Pıoner» kýrort ákimshiligine kóshkin qaýpi jáne qajetti sharalar qabyldaý týraly usynys bergen bolatyn. Joǵaryda atalǵan mamandardyń usynysy boıynsha arqandy joldyń jumysy jáne shańǵy trassalarynda syrǵanaý toqtatyldy. Abyroı bolǵanda, qaıǵyly jaǵdaı bolǵan joq», - dep habarlady vedomstvodan.
Almaty óńirinde 165 qar jınaıtyn ýchaske bar, onyń 18-i qaýipti. Jalpy kólemi 82,8 myń tekshe metr quraǵan 16 qar túsirý profılaktıkalyq jumystary júrgizildi. Avtojoldardyń aldyn ala jabylǵan ýchaskelerinde jalpy kólemi 300 myńnan astam ózdiginen túsken 100-den astam qar kóshkini tirkeldi.
Qar kóshkinin aldyn ala túsirý jumystary usynymdar boıynsha jáne «Qazgıdromet» RMK qar kóshkini stansıalary mamandarynyń tikeleı qatysýymen ótedi.
Qar kóshkinin profılaktıkalyq túsirýdi júrgizýge «RJQJ» MM, «Apattyq medısına ortalyǵy» MM, TJD jáne PD mamandary qatysady.
Sonymen qatar, mamandar Úlken jáne Kishi Almaty ózenderiniń baseınderinde 19-24 naýryz aralyǵynda qar kóshkini júrýi múmkin ekenin eskertedi.
Taýly aımaqtarda týyndaıtyn qar kóshkini - qaıtalaný jáne qıratý áseri boıynsha asa qaýipti tabıǵı qubylystardyń biri. Qar kóshkini úlken destrýktıvti kúshke ıe, onyń maksımaldy jyldamdyǵy saǵatyna 80 km-ge deıin jetedi. Qar kóshkini kezindegi qar massasynyń kólemi birneshe mıllıon tekshe metr bolady.