Bıyl taý týrıseriniń sany 4 esege artqan.
Almaty qalasynyń týrızm basqarmasy basshysynyń orynbasary Marlen Maralov taý týrızmin qaýipsiz etýdiń jaı-japsary týraly aıtty, dep habarlaıdy Almaty-akshamy.kz.
Óńirlik komýnıkasıalar qyzmetinde ótken brıfıńte bıyl taý týrıseriniń sany 4 esege artqanyn aıtty. Osyǵan baılanysty ákimdik Almaty turǵyndary men qonaqtarynyń qaýipsiz ári jaıly demalýy úshin qajetti jaǵdaılar jasaý josparyn ázirledi. Taýly marshrýttardyń shalǵaı toraptyq ýchaskelerinde jazdyń sońyna deıin týrıser panalaý úshin 15 úıshik salynady.
Árbir úıshikte izdestirý, qutqarý qyzmetteri úshin kartaǵa jáne GPS-koordınattarǵa baılanǵan reperlik bastyrma da bolady. Tótenshe jaǵdaılar týyndaǵan kezde nemese aýa-raıynyń qıyn bolýyna baılanysty úıshik týrıser kútip, qajetti kómek jıyntyǵyn alýǵa múmkindik beredi (alǵashqy medısınalyq kómek jınaǵy, marshrýt kartalary, mobıldi qurylǵylardy zarádtaý stansasy, jyly kórpe men buzylmaıtyn azyq-túlik jıyntyǵy).
Úıshiktiń janyna SOS spýtnıktik sıgnalyn qutqarýshylar púltine engizý júıesi bar dińgekter ornatylady. Dińgekter shuǵyl áreket etý qyzmetterine qashyqtan qosylady (TJD/112).
Apat sıgnalyn berýge arnalǵan barlyq spýtnıktik jabdyqtar taýdaǵy úıshik konstrýksıasyna biriktiriledi, sondaı-aq machtalar Wi-Fi fýnksıasymen jabdyqtalady. Bul júıe shalǵaı taýly marshrýttarda qıyn jaǵdaıǵa tap bolǵan tájirıbesiz, daıyn emes týrıserge arnalǵan. Paıdalanýshy ınterfeısi mınımaldy-daýystyq qońyraý túımesi, beıne qońyraý kamerasy men birneshe tildegi nusqaýlar bolady.
Qosymsha týrısik navıgasıanyń biryńǵaı júıesin qurý men taýǵa shyǵýǵa arnalǵan smart-navıgator túrindegi qosymshany iske qosý boıynsha jumys júrgiziledi. Ol TJD bazasymen ıntegrasıalanatyn bolady.
Bıyl Kishi jáne Úlken Almaty shatqaldarynda 2 baqylaý-qutqarý pýnkti salynady. Sondaı-aq alǵash ret qurylǵan 16 adamnan turatyn taý qutqarýshylarynyń jasaǵy táýlik boıy kezekshilik etedi. "Tuıyqsý" shatqalynda qosymsha tikushaq alańy salynady.