Ol qatty tońyp qalǵan, medısınalyq kómekke muqtaj bolmaǵan.
Almaty qutqarýshylary İle Alataýy taýlarynda Mánshúk Mámetova shyńyna jalǵyz attanǵan er adamdy izdestirip tapty, dep habarlaıdy Almaty-akhamy.kz.
«Respýblıkalyq jedel-qutqarý jasaǵynyń qutqarýshylary joǵalyp ketken er adamdy M. Mámetova shyńynyń muzdyǵynan tapty. Ol búgin RJQJ qyzmetkerleriniń jaıaý tobynyń muzdyqty tekserý kezinde tabyldy. Qatty tońyp qalǵan oǵan qutqarýshylar jyly kıim berdi. Medısınalyq kómekke muqtaj bolǵan joq. Qazirgi ýaqytta RJQJ jedel toby taýdan týrıspen birge túsip kele jatyr», - delingen habarlamada.
Qutqarýshylardyń aıtýynsha, er adamnyń Almaty taýlarynda joǵalǵany týraly habarlama 18 shilde kúni túsken.
«Mánshúk Mámetova kólinde túnegen 27 jastaǵy jas jigit tańerteń shyńǵa kóteriletinin aıtqan. Keshke jaqyn týrıs dosyna habarlasyp, shyńdy baǵyndyrǵandyǵyn, degenmen oǵan kómek qajet ekendigin jáne ózdiginen túse almaıtyndyǵyn eskertken. Osydan keıin er adammen baılanys úzilgen. Oqıǵa ornyna 1 birlik avtotehnıka, 6 adamnan turatyn RJQJ jedel toby shyqty. RJQJ qutqarýshylary álpınızm federasıasynyń (Tuıyqsý bazasy) álpınıserimen birlesip, izdestirýdi bastady. Álpınıserden 2 adam jumyldyryldy. Jedel top R№ 6 kóline deıin jetip, M.Mámetova shyńyna qaraı jaıaý júrip shyqty», – delingen Qazaqstan Respýblıkasy Tótenshe jaǵdaılar mınıstrliginiń baspasóz qyzmetiniń habarlamasynda.
