Onda 6,3 mln otbasy týraly aqparat jınaqtalǵan.
Qazir júıede járdemaqylar men áleýmettik tólemderdiń 9 túri boıynsha qyzmetter alý múmkindigi berilgen, dep habarlaıdy Almaty-akshamy.kz
2023 jylǵy 1 qańtardan bastap Qazaqstanda memlekettik qoldaý sharalaryn proaktıvti taǵaıyndaý úshin jumys rejıminde Otbasynyń sıfrlyq kartasy iske qosyldy.
Eńbek jáne halyqty áleýmettik qorǵaý mınıstrliginiń málimetinshe, OSK «Smart Data Ukimet» analıtıkalyq júıesimen ıntegrasıalanǵan. Ol júıede memlekettik organdardyń barlyq derekqory jınaqtalǵan. Onda tabys deńgeıi, jyljymaly jáne jyljymaıtyn múliktiń bolýy, otbasy quramy, kredıttiń bolýy jáne t.b. sıaqty ártúrli aqparat qamtylǵan.
Búginde memlekettik organdardyń aqparattyq júıeleriniń derekteri negizinde OSK-da Qazaqstannyń 19,5 mln azamaty nemese 6,3 mln otbasy týraly aqparat jınaqtalǵan.
Qolda bar derekter negizinde ekonomıkalyq, áleýmettik, turǵyn úı jaǵdaılary, densaýlyq pen bilim boıynsha otbasynyń ál-aýqat deńgeıin baǵalaýǵa jáne qadaǵalaýǵa múmkindik beretin taldaýlar júrgiziledi. Al áleýmettik táýekel týyndaǵan jaǵdaıda OSK járdemaqy nemese áleýmettik tólemdi proaktıvti túrde alýǵa múmkindik beredi. Ol úshin OSK arqyly áleýetti járdemaqy alýshyǵa SMS-habarlama jiberiledi jáne oń jaýap bolǵan jaǵdaıda oǵan tıisti tólem taǵaıyndalyp, tıisti qarajat banktik shotyna aýdarylady.
Eske sala ketsek, OSK 2022 jyldyń 1 qyrkúıeginen bastap pılottyq rejımde iske qosyldy. Aprobasıa kezeńinde memlekettik qyzmet kórsetýge kelisim alý úshin barlyǵy 56,9 myń SMS-habarlama jiberilip, jaýap bergen 12,9 myń azamatqa qoldaý sharalary kórsetildi.
Qazir OSK-da járdemaqylar men áleýmettik tólemderdiń 9 túri boıynsha qyzmetter alý múmkindigi berilgen:
júktilikke jáne bosanýǵa baılanysty tabysynan aıyrylǵan jaǵdaıda áleýmettik tólemder;
bala kútimine baılanysty tabysynan aıyrylǵan jaǵdaıda áleýmettik tólemder;
jumysynan aıyrylǵan jaǵdaıda áleýmettik tólemder;
asyraýshysynan aıyrylǵan jaǵdaıda áleýmettik tólemder;
múgedektigi bar bala tárbıelep otyrǵan ata-anaǵa (qamqorshyǵa) beriletin járdemaqylar, múgedektigi boıynsha járdemaqylar;
kópbalaly otbasylarǵa beriletin járdemaqylar;
«Kúmis alqa» nemese «Altyn alqa» alqalarymen marapattalǵan kópbalaly analarǵa beriletin járdemaqylar;
ataýly áleýmettik kómek.
Sondaı-aq azamattarǵa OSK arqyly zeınetaqy tólemderin alý múmkindigi týraly avtomatty habarlama jiberiledi.
2023 jyly áleýmettik qorǵaý salasyndaǵy qyzmetter tizbesi keńeıtiledi. 2024 jylǵy 1 qańtardan bastap densaýlyq saqtaý jáne bilim berý salalaryndaǵy memlekettik kepildikter engiziledi. 2025 jyldan bastap joǵaryda atalǵan 3 salada memlekettik kepildikterdiń barlyq túri qamtylmaq.