Qazaqstan Respýblıkasy Táýelsizdiginiń 30 jyldyǵyna arnalǵan «Almaty - Táýelsizdiktiń altyn besigi» atty qalalyq kórme ótti.
QR Sýretshiler odaǵy Almaty qalasy ákimdiginiń qoldaýymen 19 qyrkúıekte Qala kúninde bastalyp, 10 kúnge sozylǵan keskindeme boıynsha qalalyq plener ótkizgen bolatyn. Sol is-sharada oryndalǵan jumystar atalmysh kórmede usynylady. Jobaǵa barlyǵy 15 sýretshi qatysty. Olardyń ishinde QR Sýretshiler odaǵynyń 10 múshesi jáne QR Sýretshiler odaǵy janyndaǵy Jas sýretshiler odaǵynyń 5 múshesi bar. Bul bes jas sýretshi - 1991 jyly týylǵan, ıaǵnı, Táýelsizdiktiń qurdastary. Jobanyń maqsaty qala damýynyń úsh kezeńin kórsetý bolyp tabylady. Vernyı qalasynyń damýynyń erte kezeńindegi qurylystar, onyń ishinde HİH ǵasyrdaǵy aǵash ǵımarattar beınelenedi. Sonymen qatar sáýlet óneriniń ózindik stıli bar ári qazirgi ýaqytta memlekettiń qorǵaýyna alynǵan keńestik kezeńniń kóptegen ǵımarattary jáne HHİ ǵasyrdyń ındýstrıalızasıasyn kórsetetin nysandar, jańa tehnologıalarǵa negizdelgen Táýelsizdik kezeńindegi Almatynyń jańa beınelerin kórsetedi.
Sýretshilerge arnaıy ekskýrsıa júrgizilip, onyń barysynda qatysýshylar kóptegen qyzyqty dúnıelermen tanysty. Mysaly, Vernyı qalasynyń aǵash ǵımarattarynda seısmıkalyq turaqtylyq máselesi qalaı sheshilgen? Ol úshin úılerdiń astyna jer silkinisin sóndiretin arnaıy jastyǵy bar jartylaı jertóleler salynǵan eken. Bul úılerdiń sýretterin kórmede kórýge bolady. Keńestik kezeń qalanyń basty belgisine aınalǵan ǵımarattarmen jáne eskertkishtermen usynylyp otyr.
2021 jyly qaıta jóndeýden ótkizilgen músinder saıabaǵyn qamtıtyn Á. Qasteev atyndaǵy Memlekettik óner murajaıy ǵımaratynyń qasbeti birinshi ret sýretteldi. Shyǵys aınalma joly, Nurly taý ǵımarattary, Halyq arena, jańa zaman talabyna sáıkes qalamyzdyń damýyn bildiretin zamanaýı kvartaldar sýretshilerdiń shyǵarmalarynda alǵash ret kórsetilip otyr. Bul jumystar endi qala tarıhynda máńgi qalady. Kórkem shyǵarmalardaǵy qala kórinisteri men HHI ǵasyr sýretshileriniń qazirgi zamanǵa degen kózqarasyn beıneleıdi.